Shillong, Nailar 22:
Ka Khasi Student Union Sengkmie kan sa phah da ka jingthoh sha u Myntri rangbah ka jylla Assam u Himanta Biswa Sarma ba un ai jingïada kaba kyrpang ïa ki khasi kiba sah ha Khalakhal-1 & 2 kaba hap ha Silchar District.
Ka KSU Sengkmie na Shillong ha jingïalam u bah Lambokstarwell Marngar kum u President, u bah Donald V Thabah uba dei u General Secretary ryngkat palat 30 ngut ki nongkitkam na Jaintia Hills District ki la hiar sha kane ka shnong ha ka 21 tarik mynta u bnai hadien ka jingshah shoh ki khasi ha ki runar kiba dei na kiwei ki jaidbynriew kiba sah marjan katei ka shnong haduh ba hynriew ngut ki la mynsaw bad uwei u dang shah sumar ha hospital.
Haba ïakren bad u bah Donald V Thabah u la ïathuh ba haduh mynta ki pulit ka Assam ki dang ïohkem tang 3 ngut ki runar kiba donkti ban thombor ïa ki khasi katba kiwei pat ki dang lait phet.
U la ïathuh haba ki nongïalam ka KSU na Shillong ki la poi sha Silchar haba ki la mut rung shapoh ka shnong Kalakhal ki la shah pynsangeh ha ki pulit Assam namar kim shah ban wan rung ki briew na kawei ka jylla hynrei hadien ka jingïakren sngewthuh jingmut la shah ban rung tang 10 ngut shapoh shnong.
U la ïathuh biang ba ha kane ka jingïakren, ki khasi ki kwah ba ka sorkar Assam ka dei ban ai jingïada ïa ki khnang ban shngaiñ haba ki leit trei leit ktah khnang ban nym jia shuh ka jingshah thombor. Shuh shuh u bah Donald u la pyntip ba ki nongïalam ka seng ki la leit jngoh ruh ïa uba shah pom da ka wait ha ki runar uba dang shah sumar ha Silchar Hospital.
“Ngi leit sha Khalakhal ka long ban pynthikna ba ki paradoh parasnam jong ngi kim dei ban shah pyndik namar ngim kwah ba kin shah thombor man ka por” u la ong.
u la pyntip ba ïa kane ka jingshah thombor la pyntip da ki dkhot ka KSU Barak Valley Unit.
Kum ban shu pynkynmaw ka Khalakhal-1 ka don kumba 40 ïing bad Khalakhal-2 ka don palat 50 ïing bad ki briew ha kane ka shnong ki im da ka rep tympew, kwai bad kiwei de namar ki sah sha jaka lum.
