Shillong, Nailar 22
Ka Khun Hynñiewtrep National Awakening Movement (KHNAM) ka la dawa ïa ka Sorkar Jylla ba kan ïakren bad ka Sorkar Pdeng ha kaban pynkylla ïa ka Presidential Order 1950 kaba ïadei bad ka thup Scheduled Tribe (ST) ka Meghalaya.
ÏA kane ka jingdawa ka KHNAM ka la pynsngew lyngba ka shithi ba la phah sha u Chief Secretary (CS) ka Jylla u Bah D.P.Wahlang.
Haka shithi ba la phah u Working President ka KHNAM, kata u Bah Thomas Passah u la ong ba ka party ka la kyntu ïa ka Sorkar Jylla ban bthah ïa ki bor ai Scheduled Tribe ka Jylla ba kin bud thik pa thik ïa ki kyndon ba la pynmih da ka Ministry of Home Affairs (MHA) ba la pynmih ha u snem 1975 bad 1977 bad ban phah ktien sha ki tnad Sorkar Pdeng ban pynthikna ba kin ai ïa ka bhah ST ka Jylla Meghalaya tang ïa ki trai ri trai muluk kiba shong ba sah ha Jylla (Khasi, Jaiñtia bad Garo).
U la kyntu ruh ïa ka Sorkar Jylla ba kan bthah ïa ki bor ba ai ST ba kin pdiang ïa ki jingujor pyrshah ïa ki briew ba don jingartatien ba la ïoh syrnot ST ha ki snem ba la leit noh bad ban pynduh noh ruh ïa ka hok ST hadien ba la pynshisha bha ïa ki kot ki sla.
Katkum ki kyndon ka MHA, u briew u lah ban kam ba u dei u SC/ST ha la ki jaka shong bad u briew ba krih na kawei ka Jylla sha kawei pat kim lah satia ban kamai ïa ka hok SC/ST ha ki jylla thymmai satang lada ki dei na kajuh ka Jaidbynriew ha kata ka Jylla.
La ong ruh ba ki briew kiba ïashong kurim kiba dei na ka Jaidbynriew SC/ST kin ym lah ban long ki dkhot jong kata ka jaidbynriew.
Une u Nongïalam ka KHNAM u la kynnoh ruh ba ïa kine ki kyndon ym shym la pyntreikam ha Meghalaya, kaba lam sha ka jingpyndonkam bakla ïa ki syrnot ST da ki briew ki bym dei ki trai ri trai muluk jong ka Jylla.
U la kdew ruh ïa ki khep ba ki briew ki la pynkylla ïa ki kyrteng bad ki jait ban kam ïa ka hok ST.
“La shem ruh ba ki don ki khep ha kaba ym shym la pynshisha bha ïa ki kot ki sla haba ai ïa ki syrnot ST ha Jylla Meghalaya, nalor kata, ki jingmyntoi ST kiba dei ban ïoh tang ki trai shnong (Khasi, Jaintia bad Garo) ba sah ha Jylla la pynïoh ruh ïa ki riewlum ba shu wan krih na kiwei ki Jylla bad ba shu sah tang shipor ha Jylla. Kane ka la paw bha haba don ki bhah ha ka thungkam ïa ki ST ha ki Tnad ka Sorkar Pdeng ha ka Jylla” u la bynrap.
Shuh shuh u la ong ba ki don bun ki khep ha kaba ki briew ki la pynbna ïalade hakhmat u Notary Public bad pynkylla ïa ka kyrteng bad ka jait kum ka nuksa Ruksana Parbeen (Muslim) sha ka Evaline Sumer (Khasi), Momin Khezar sha u Erick Sumer. U la ban jur ruh da kaba ong ba kum kine ki jingeh ki buh ha ka jingma kaba khraw ïa ka Jaidbynriew bad ka long pyrshah ruh ïa ki kyndon jong ka MHA.
Haba kdew sha ka rally thungkam ba kyrpang ki BSF na ka bynta ka kam constable (GD) ïa ki ST ha Meghalaya, u Bah Passah u la kyntu ïa u Chief Secretary ban ïakren bad ki bor shipai BSF ban pynthikna ba tang ki jaidbynriew Khasi, Jaiñtia bad Garo ka Jylla ki dei kiba la kheiñ kum ki ST na ka bynta kane ka rally ka ban long kat kum ki kyndon ka MHA.
