Nongstoiñ, Nailar 22
Ka Hynniewtrep Youths’ Council (HYC) West Khasi Hills District ka la kyntu bad kyrpad ïa ka sorkar Jylla ban pynkhlaiñ shuh shuh ban buh da kawei ka Infiltration Check Gate kaba dei ka khyrdop talasi ha Shahlang bad sa kawei pat ha Langpih khnang ban teh lakam shuh shuh ban nym ailad ïa ka jingrung beaiñ jong ki briew kiba nabar .
Halor kane ka bynta , u Samla Disterborlin Wanniang Vice President HYC West Khasi Hills District ryngkat ka jingdonlang u Samla Blaster Sohmat President,Samla Spailin Wanniang General Secretary HYC Nongtrai Circle ryngkat ki Nongïalam ka Ri Muliang Circle, ba la ïalam da u Samla Shaiñborlin Syiemlieh General Secretary bad ki dkhot, kala ïoh ban hiar ha Athiabari Check Gate Infiltration ban leit jngoh bad ban ai mynsiem lem namar kumba ka seng kajuh peit pyrman ka ïohi ïaka jingtrei shitom ki pulit ha kane ka Infiltration ha Athiabari.
Haba kren ha ki lad pathai khubor, u Samla Disterborlin Wanniang Vice President HYC West Khasi Hills District u la ong, ka seng ka wan hangne ban ai mynsiem ïa ki pulit ba kin nang trei shitom ban nym ailad ïaki bar Ri kiba lah shah kheiñ beaiñ ha ka sorkar Assam.
“Kumba ka seng kala ïakynduh ïa u DC, ïa u SP ka West Khasi Hills District ban shimkhia halor ka jingrung mynder ri, ngi ïohi kila shimkhia shisha hynrei kum ka seng ngi ïai kyrpad, ngin ïa shimkhia lang ban nym ailad ba kin rung haka Ri kaba ieid jong ngi” ong ki nongkitkam ka HYC
Ki la ong ruh ba ka seng halor kane kan nang ïai buddien bad ïai peit pyrman ha kine ki Sngi ban nym ailad ïaki mynder ri ban rung.
