Ka ai jait kmie ka dei ka buit ban pyntroin ïa ka bor bad ka iktiar u rangbah (shynrang). Kane ka ïatrei kam naduh ki por ba mynshuwa ba dang don ka jingïaleh thma markynti namar ka jingioh burom bad ioh nam u shynrang Khasi kum u Khadarbor. Ha ki por mynshuwa ki dang ïa thied bad ïa die mraw ïa ki briew. Dei naduh kata ka por ba ka diengiei ka dang ïeng rasong kaba long ka dak ka por ka dang jyllei ha ka Bri u Hynñiewtrep Hynñiewskum. Ka jingïaleh thma hapdeng kawei ka Hima pyrshah ïa kawei pat. La ong ba ki don ki rangbah kiba la shah liang bad ki kynthei ban sloit noh ïa ka bor bad ka iktiar u shynrang uba dang bat ïa ka jait ha kata ka por.
Ka la don ka jingïaleh thma kaba jur hapdeng ki para rangbah kiba ïa shah liang ïa ki kynthei bad ki bym kwah ba ka jait ka kynja kan leit noh sha ka kmie ne kynthei. Lehse ngi la ïa bna ïa ka thma hapdeng u Lum Kylliang bad u Lum Symper ka long hapdeng ki para khadarbor. Kane keiñ ka dei ka daw ba ïa ka jait ki sa ai noh sha ka kmie kaba long ka nongri nongsumar ïa ka ïing ka sem. Te, namar ka don ka jingïaleh thma kaba jur bad bun na ki rangbah ki la iap noh ha ka jingïaleh thma. Kumta hadien kim banse kiba laitim na ka thma ki bynshet noh ïa ka jait sha ka kmie (kynthei). Dei naduh kata ka por sa ioh jait noh ka kmie. Kane ka long ka khana lyngkot shaphang ka jingai jait kmie ha ngi ki khun Khasi khara naduh kata ka por u mynbarim bajah.
C. B. Iawphniaw
