Kabul, Nailar:
Ki bor pyniaid ka Afghanistan ki la pyntip ba ka jingkhlad jong kiba ngat ha ka jingjia iatyngkhuh kali kaba shyrkhei ha Afghanistan, ka la nang kiew sha ka 79 ngut.
Katei ka jingiatyngkhuh ka bos kaba kit ia kitei kiba bun ki pasenjar, ka la jia ha ka surok-bah Hera sha Kabul, ha kaba katei ka bos ka la iatyngkhuh bad kawei ka thuk- thuk, kumjuh ruh bad kawei pat ka trok, ha ka por shiteng miet jong ka Sngi Ba-ar.
Katei ka bos ka dei kaba kit ia ki nong Afghanistan kiba la shah pynmih noh na Iran namar ba ki long tang ki nongbuhai shnong bym biang kot- biang sla.
U Lamphang jong ka tant kam poh iing, u Abdul Mateen Qaniee, u la ong ba katei ka bos ka la kem ding syndon ha ka por ba ka iatyngkhuh bad katei ka trok, tang hadien 30 minit ba ka la tam ia ka Heart. La iathuh ruh ba napdeng jong kitei ki 79 ngut kiba khlad, 17 ngut pat ki dei ki khyllung- khynnah.
Katkum ki video ba la saphriang paidbah, la iohi ia katei ka bos kaba la kem ding jur ha ka por ba ka la kylla bad hadien ba ka la iatyngkhuh bad katei kawei pat ka trok.
Watla katta, la ong ba ki jingjia iatyngkhuh kali hapoh Afghanistan, kim long kiba sngewpher haduh katta, namar ka jingbym biang jong ki lynti- synkien bad ki surok ban leit- ban wan, namar ka jingshah tkah jur jong katei ka ri ha ki thma kiba ju jia naduh ki snem bad ki phew snem ba la leit.
Ka Heart, ka dei ka thaiñ khappud jong ka Afghanistan, kaba iakynduh bad ka Iran bad Turkmenistan. Ka long ruh ka lynti iaid ba ju pynmih ia ki phetwir na katei ka ri ban pynpoi noh sha kiwei pat ki ri ba marjan.
