Shillong, Nailar 22
U Babu Kular Khongjirem u wei na ki nonghikai u ba la kham rangbah bha ha ka kam hikai skul u la ong ba lada ki nonghikai ki kyrshan ïa ka Meghalaya Education Grant (MEG) ba la thmu pyntreikam da ka tnad pule puthi ka Sorkar Jylla, ynda ngi la shongthait ngin hap rah lypa ka Guitar ban shong khrong sha Khyndailad.
Ïa kane u Babu Kular Khongjirem u la kren ha ka jingïalang ba wan kyrshan ïa ki nonghikai All Primary School Teacher’s Association (APSTA) kiba la pynlong ïa ka jingïakhih ïaid paidbah ban pyrshah ïa ki mat ba thmu pyntreikam ka tnad pule puthi ka Sorkar Jylla kaba la long ha ka 22 tarik u Nailar 2025.
Haba kren ha katei jingïalang u Babu Kular u la ong ba u pyrshah ïa ka jingthmu ka tnad pule puthi ban pynduh noh ïa ki skul deficit bad ban pyntreikam noh da ka Meghalaya Education Grant (MEG).
“Ki nonghikai deficit bad ki nonghikai SSA ki long kumjuh ha ka rukom siew ïa ki jingsiew bapher-bapher, hynrei lada pyntreikam pat ïa ka MEG ka tulop bad ki jingïoh jingmyntoi ba ki nonghikai deficit ki ïoh, ka pynlong ïa ki ban ym ïoh baroh namar la aiti ban siew pisa da ki Managing Committee jong ki skul” la ong u Babu Kular.
U la ong ba ym lah shaniah ïa kane ka rukom siew pisa namar ha ka Managing Committee don u ba bha bad don ruh u ba sniew.
“Kane ka Meghalaya Education Grant (MEG) mynta ka dei ka Adhoc thymmai bad kiba ïoh ïa ka ‘basic’ bad ki DA kum mynta ha kane ka bynta (category) ki dei tang ki ‘deficit pattern’. Ki Garo Union School kidei ki ‘deficit pattern’ kim ïoh kumba ïoh mangi hynrei ki ïoh tang ka basic bad ka DA bad ym don jingmyntoi shuh. Ïangi ki ‘deficit’ la pynhiar kyrdan sha ka ‘deficit pattern’, na ka ‘deficit pattern’ kham hapoh shuh shuh kin sa pynhiar bad hato kata kadei ka pule puthi ka jylla Meghalaya ban nang pynhiar” la bynrap u Babu Kular.
U la ong ruh ba u ba wanrah khatduh ïa ka ‘deficit system’ ha u snem 1988 dei u Kpa jong u Conrad K Sangma u ba long u Myntri Rangbah ka Jylla ba mynta, hynrei mynta pat ba la synshar u khun u wan pynban ban pynjot ïa ki nongrim, ban pynjot ïa ki paidbah ka jylla, da kaba ong ba u Conrad Sangma u la dei ban sngewrem namar kaba la thaw da u kpa dang pynjot kylla u khun.
Kumta u Babu Kular u la kyntu ïa baroh ki nonghikai hapoh ka shatri jong ka APSTA ba kin da pyrkhat bha halor kane ka kam jong ka sorkar, da kaba kdew ba hato kane kadei ka sorkar kaba bha ne ka sorkar kaba pynjot, kaba thmu pynjot ïa ki nonghikai, bad ban pynjot ïa ka pule puthi.
