Shillong, Nailar 22:
Ka jingpyntreikam ïa ka jingshna ïa ka surok na Shillong sha Dawki kaba la pyntrei da ka kompani National Highways and Infrastructure Development Corporation Limited (NHIDCL) kala wanrah ka jingjulor bad ka jingkylla dur ha ka Wah Umtyngar namar ka jingshah theh shyiap bad maw, kumta naka liang ka kynhun ïa kaba la tip kum ka Green Tech Foundation (GTF) ha ka 22 Tarik Nailar, 2025, ka la leit ban mih bad buh da ka jingthoh hakhmat u General Manager ka NHIDCL, u Kunal Barua kaba don ha Nongmynsong Langkyrding ha kaba ïadei bad ka jingpyntrei ïa kane ka surok.
Haba kren sha ki lad pathai khubor, u Bah H. Bansiewdor Nonglang uba dei u Chairman ka Foundation, ula ong ba ka jingleit ban ïakynduh ka Foundation ïa ki Ophisar jong katei ka Ophis treikam kam dei ban pyrshah ïa kano kano ka kam pynroi hynrei ka dei beit thik ban ïakren ha kaba ïadei bad ka jingtheh khyndew ka NHIDCL sha ka Wah Umtyngar kaba don ha Mylliem bad pynkylla nala ïa ki tyllong umbam umdih kaba la ktah bad pynjot shikatdei eh ïa ka mei mariang.
“Ngi khlem shym la ïakren ïa ka jingkhang pyrshah ïa ka roi ka par bad ngi khlem shym la mih ban ïakren ïa kata hynrei kata ka dei da kawei ka phang. Ngi ïakren beit ïa kata ka jingpynlong ïa ki wah kum ki jaka theh maw bad khyndew kiba ngi hap ban pyrkhat ïa ki wah jong ngi kum ka Wah Umtyngar kaba ai ïa ka umbam umdih, umrep-umriang bad katei ka Wah ka poi sha Mawphlang bad baroh kawei ka Sor Shillong ka ïoh umdih umbam na Mawphlang”, ong u Bah Nonglang.
U Bah Nonglang u la ong ba ka kynhun kan ïai buddien beit halor kane ka kam bad mynta naka liang ka Meghalaya State Pollution Control Board (SPCB) ka la pynmih syndon da ka hukum sha ka NHIDCL ba ka dei ban leit khat mardor ïa ka khyndew ba la bret sha ka wah kaba don ha Umtyngar.
Nalor kata, u Bah Nonglang u la ong ruh ba ula ïoh jingtip ba ïa ka kam kontrak ban theh ïa u maw bad shyiap ha katei ka jaka la aiti sha ki briew kiba dei ki trai ri ban leit theh sha kiwei ki jaka, kumta ula buh ka jingmaham kaba tyngeh ba kine ki briew kiba pyntrei ïa ka kam kim dei ban shim kabu bad ban pynlong ïa ka wah kum ka jaka theh maw bad shyiap.
“Nga ïohi ba ka dei ka jingshim kabu. Ngam tip hynrei katkum ka jingong hangne hangtei ba lehse, ki lah ban dei ki jong ngi ruh kiba ïoh kam kontrak bad ka khubor kaba shai ka long ba wat pynlong ïa ki wah kum ki jaka theh maw bad shyiap namar naka liang ka Green Tech Foundation ngin nym ailad”, ong u Bah Nonglang.
Shuh-shuh, u Bah Nonglang ula ong ba ka jingdon ka surok bad ka jingwanrah ïa ka roi ka par ka long kaba donkam bha hynrei ki jingpyntrei surok hapoh Meghalaya mynta la leh da ka lynti kaba ym don jingkyrmen shuh ïa ka lawei.
