Shillong, Nailar 22
Ki nonghikai kiba don hapoh ka shatri jong ka All Primary School Teacher Association (APSTA) ha ka 22 Tarik u Nailar 2025 ki la pynlong ïa ka jingïakhih da kaba ïaid paidbah ban pynpaw ïa ka jingpyrshah jur ïa ka tnad pule puthi ka sorkar jylla halor ka jingthmu ban pyntreikam noh ïa ka Meghalaya Education Grant (MEG).
Kane ka jingïaid paidbah ki nonghikai ki la sdang naduh na Jail Road,Puja Mandal, Khyndailad ter ter shaduh sha DC ophis bad la pynkut pat ha community Hall ka Golf Links.
Ha kane ka jingïaid paidbah la sakhi ba da ki spah ngut ki nonghikai APSTA kiba la wan ban ïashimbynta kiba na kylleng ki district. Kane ka jingïaid paidbah ka la long kaba jai-jai.
Haba ïakren bad u General Secretary ka APSTA u Bah FC.Shullai u la ïathuh ba kadaw ba pynlong ïa kane ka jingïakhih da kaba ïaid paidbah kadei hadien ba ka tnad pule puthi ka sorkar jylla ka la thmu ban pyntreikam noh ïa ka MEG.
U la ong ba ka jingpyrshah ka long ba ïa ka post nonghikai skul Lower Primary kiba la ïoh ïa ka jingsiew (Deficit) kiba dang don ha ka kam mynta haduh ba kin da shongthait kata ka post kam dei shuh ha ka deficit kan leit noh ha ka MEG.
“Kane ka jingthmu ka tnad pule puthi ka sorkar Jylla kalong ban knieh noh ïa ka hok ka jong ngi kaba dei ka bynta ka jong ngi” la ong u Bah Shullai.
Shuh shuh u la ïathuh ba ka sorkar jylla ka la ong ba ïa ka pisa yn thep noh ha ka skul Management bad kata ka skul management kan sa siew ïa ka tulop sha ki nonghikai.
“Ngam ong ba ka leh ka sorkar jong u Conrad, hynrei la leh hi ka tnad pule puthi da ki katto kattne ngut ki ophisar ban pynkylla bad ban pynkulmar bad ka jingeh pat sha ngi” u la ong.
” Kaei kaba kham ktah shuh shuh ha kane ka MEG kaba phi ïohi ba ngi ong “We Oppose MEG”. Ha ka jingshisha ngim pyrshah ïa ka MEG baroh khoit namar kan don hi katto kattne ka bynta ha ka MEG kaba long ka jingmyntoi ruh ïa ki Adhooc bad ïa kiwei kiwei ki nonghikai kiba ïoh ïa i tulop barit jong ki bad lada wan kane ka MEG kan ïoh ka baheh ka tulop ïa ki bad ngi kmen hynrei phim lah pat ban knieh ïa ka tulop jong ngi ban pynheh ïa kiwei pat ki nonghikai”, la bynrap u Bah Shullai.
U la ong ba ngi pyrshah ruh halor ka jingthmu ban pynlong ne pynwan ïa ka skul Account naduh secondary, Upper primary, lower primary ha kawei ka Account.
Shuh shuh u la ong ba lada ka sorkar jylla kam sngap ïa kane ka jingïakhih jong ki nonghikai kin sa pynlong shuh shuh da ka jingïakhih kaba kham tyngeh ym tang ha ki district hynrei ha baroh kawei ka jylla.
