Shillong, Nailar 22
Ka kynhun ïalehkai ka India jong ki kynthei ha ka kyrdan U-17 ka la jop da 2-0 kol ïa ka Bangladesh ha ka lympung ïalehkai jong ka SAFF U-17 Women’s Championship 2025 kaba la long ha madan Changlimithang Thimphu, ha ka 22 tarik, Nailar 2025.
Ka kynhun ïalehkai ka Ri ka la ïoh ban sdang thep kol lyngba ka Pearl Fernandes ha ka minit ka ba 14, bad ka kol ba ar ha ka minit ba 76 kaba ka Bonifilia Shullai ka la lah ban thep kol da ka khlieh.
Ka kynhun ïalehkai ka India ka la synshar ïa ka jingïalehkai, da kaba pyni ïa ka jingïalehkai kaba tbit ha kaba ka la khanglad ïa ka Bangladesh ban ïoh thep kol.
Kane ka jingjop jong ka India ka pynskhem ïa ka kyrdan ba nyngkong jong ka ha ka group da kaba kamai 6 poiñ na ki 2 tylli ki jingïakhun.
Ha kane ka lympung ïalehkai jong ki kynthei U-17 jong ka SAFF 2025 ki don saw tylli ki kynhun kiba kynthup ïa ka Bangladesh, ka India, ka Nepal, bad ka Bhutan.
Kane ka lympung ïalehkai ka bud ïa ka rukom ïalehkai kaba arsien, ha kaba ka kynhun kaba ïoh bun poiñ la pynbna kum ka nongjop.
Ka India bad ka Bangladesh ki don ïa ka histori kaba riewspah bha ha kane ka jingïakob, ha kaba ki la ïakhun haduh saw tylli ki phainal bad rah mar ar tylli ki nam lahduh.
