Shillong, Nailar 22:
Ka Myntri ka Tnat ka koit ka khiah ka Sorkar Jylla, ka Dr. Mazel Ampareen Lyngdoh kala pynpaw ka jingsngewkhia kaba jur halor ka jingjia shah dung thyrñia injek kawei ka khynnah skul dang shen kaba la jia ha Jaïaw Madan Student.
Kum ban shu pynkynmaw hangne ba ha ka sngi Nyngkong, kawei ka khynnah skul kala shah dung da u thyrñia injek ha ki arngut ki runar kiba la kah dur ïalade kiba la ap lypa da ka Scooty ha katei ka surok ha Jaïaw kaba la jia ha ka por kumba 2 duna eiei mynsngi.
Haba kren sha ki lad pathai khubor haka Sngi Thohdieng haka 22 Tarik Nailar, 2025, ka Dr. Ampareen ka la pyntip ba ka Seng jong ki longkmie lane ka National People’s Party Women’s Front (NPWF) kala leit ban jngoh ïa katei ka khynnah ha Dr. H Gordon Robert Hospital, Jaïaw.
“Ïa mynta, ngi dang lum ïa ki jingtip kiba donkam ban peit bniah ïa ka jinglah ban shah ktah kaba kane ka samla ka lah ngat ha katei ka jingjia. Kine ki jingjia jong ka jingshah dung da u nar injek ki long kiba jia manla ka por hynrei ki long kiba sngew shyrkhei, bad ka Sorkar ka hap ban shimkhia. Kam dei tang ban kem ïa ki nongleh kam sniew hynrei ban wad bniah ïa kaei kaba la jia shisha, kaei ka jinglong jingman, kaei kaba la pynlong ïa ka, bad haduh katno kane ka samla ka la shah pyndik”, la ong ka Dr. Ampareen.
Ka la bynrap da kaba ong ba ka long kaba donkam bha ba ka Jylla Meghalaya kan sdang ban pyntreikam thikna noh ïa ka projek Drug Reduction, Elimination, and Action Mission (DREAM) ka ban long ka lad ka ban lah ban tehlakam ïa ka jingjyllei u drok hapoh ka Jylla.
“Ngi la shah bat ha ka jingeh. Ngi tip ïa kaei kaba ngi donkam ban leh. Ngi ïakynduh shwa bad ki tnad ban pynthikna ba kane ka projek DREAM kaba kordor kan ym duh lynti tang ha ka jingpynkhreh jong ka Sorkar na ka bynta u drok hynrei kan ïaid shabar jong kata bad ha ka jingshisha ka ban shakri kum ka jaka treikam kaba kongsan”, bynrap ka Dr. Ampareen.
Shuh shuh, ka Myntri ka la pyntip ba shen ka Sorkar kan sa pynbna ïa ka jaka sumar kaba pura na ka bynta ban sumar ïa ki nongdih drok, khamtam ha ki nongbah kum ha Shillong bad Tura.
Ka la ïathuh ruh ba ka Jylla ruh mynta ka la don ïa ka jaka ai jingsumar naka bynta ki kynthei kiba la kyrni ha u drok, kaba long ka mawjam kaba kongsan ha ka jingpyrshang jong ka Sorkar ban ïakhun pyrshah ïa ka jingeh jong ka jingma jong u drok.
Ka la ong ba kaba donkam ka dei ban don ïa ki jaka sumar ba la buh khnang naka bynta kane ka jingeh, bad ong ba ka Sorkar kam lah ban tehlakam tang na ka jingdon ki ‘Rehab Centre’ ne ki ‘Detox Centre’ hynrei ka donkam ban peit ruh na ka bynta ka jingthmu kaban ïohi jngai.
