Shillong, Nailar 22
Ka kynhun ki ‘thei ïalehkai Under-17 ka Nongjri Presbyterian Secondary School ka la jam sha ka quarter final ha ka International Subroto Mukherjee Football Cup 2025, hadien ba ka la pynliem noh sa ïa ka Dadra and Nagar Haveli and Daman and Diu (DNH&DD) haduh 12-0 kol ha ka sngi Thohdieng ha nongbah Delhi.
Ka Daphi Syngkli ka la khur ïa artylli ki hattrick da kaba thep marwei haduh 7 kol. Ïa ki ar kol la thep da ka Jasmine Syngkli bad ka Rimika Khongkai, katba ïa ka shikol pat la thep da ka Ibamihpli Kharpan.
Da kane ka jingjop ka Nongjri Presbyterian ka la ïoh ban lamkhmat ha ka Pool-D da kaba kamai 9 poiñ na ki lai sien ïakhun.
Kham hashwa ka Nongjri Presbyterian ka la jop ïa ka International School Sports Organisation (ISSO) da 5-0 kol bad ïa ka Government Model SR Secondary School Sector 22 kaba na Chandigarh da 3-0 kol.
