Shillong, Nailar 22
U Ajay Singh u la shah jied biang kum u President jong ka Boxing Federation of India (BFI) ha ka sien kaba lai lynter, ha kaba u la ïoh 40 vote pyrshah ïa u Jaslal Pradhan uba la ïoh 26 vote. U Singh, uba dei ruh u nongpynïaid jong ka SpiceJet Airlines, u la pynpaw ïa ka jingkmen halor kane ka jingmih, da kaba pynpaw ba ka dei ka jingpynskhem biang ïa ka jingshaniah bad jingngeit ba ki paralok jong u ki la buh ha u. U la ban jur ïa ka jingthmu jong ka synjuk ban pynlah ïa ki nongïalehkai boxing ban pyni ïa ka jinglah jong ki bad ban wanrah ïa ki takma sha la ïing, khamtam eh haba ka jingïalehkai World Championship bad ka World Cup ka ban dang wan.
Katba ïa ka kyrdan kum u General Secretary la jied ïa u Pramod Kumar u ba la ïoh 36 vote da kaba pynliem noh ïa u Digvijay Singh u ba ïoh tang 30 vote. Ïa ka kam Treasurer la jied ïa u Pon Baskaran uba ïoh 28 vote uba la pynliem noh ïa u Anil Kumar Bohidar bad u R Gopu.
Kane ka ilekshon, kaba la long ha ka 21 tarik Nailar, 2025, ka la don ka jingïashim bynta na ki 34 tylli ki jylla kiba la pynïeng ïa 66 tylli ki vote. Hynrei ka jingmih ka shong ha ka jingmih kaba khatduh jong ka mukotduma kaba dang ïaid shakhmat ha ka ïingbishar jong ka Delhi, ha kaba katto katne ki jylla ki la tuklar ïa ki jingpynkylla ha ka riti synshar ba la wanrah da ka komiti ba shipor. Ka tnad ïalehkai ka la shim ïa ka rukom ap bad peit, hadien ba ki la dep pyntip sha ka ïingbishar ba kim tharai ba ka rukom pynlong bad pynïaid ïa kane ka ilekshon ka long kaba dei.
