Jowai, Nailar 22
Lai ngut ki nongtuh kali ki la shah kem noh hadien ka jingïoh kurup ïa lai tylli ki ar shaka ba shah tuh na ka jaka khlaw ha ka shnong Demthring, West Jaintia Hills ha ka step 22 tarik Nailar.
U Superintendent of Police ka West Jaintia Hills District, u Jagpal Singh Dhanoa u la ong hadien ba la ïoh ïa ka jingtip kaba thikna, ki pulit ba kyrpang na Jowai DEF hapoh ka jingïalam u Additional Superintendent of Police, u Bah Jason Myrom ki la pynlong mardor ïa ka jingkhynra ha ki bynta jong ka thaiñ Demthring ha kaba ki la ïoh ban bat noh ïa kawei ka kali Alto K10 kaba kit ïa ki bynta jong ki kali ar shaka.
Haba pynlong ïa ka jingtohkit ïa ki briew kiba don hapoh kane ka kali ha kane hi ka jaka ki pulit ki la lapdien ïa lai tylli ki Yamaha Cygnus Ray ZR kiba don ïa u No. ML05V 4471, ML05Y 5008 bad ML05AC 0799 ïa kiba la buhrieh ha ka jaka khlaw kaba don marjan.
Kine ki lai ngut kiba la shah kem noh ki dei kiba la tip kyrteng kum u Jopparson Rabon (24) bad u Meshanki Langstang (22) kiba dei na Thangrain bad u Paulme Sungoh (21 snem rta) uba dei na Wahnangbah Iawmusiang.
Ki pulit ki la lap ïa u Rabon katba u dang niah ïa katei ka kali Alto K10 ka bym don nombor plate katba u Meshanki u la shong kum u passenger katba ïa u Paulme la ïoh bat na katei ka jaka khlaw hajan Demthring ka jaka ba la ïoh kurup ïa kine ki kali ar shaka ba la buhrieh.
U SP u pyntip ba hadien ka jingtohkit bniah kine ki runar ki la phla ba ki la tuh ïa kine ki ar shaka na ka thaiñ Laban bad Jhalupra, Shillong.
U la ong ruh ba ïa kine ki ar shaka kumjuh ïa kane ka Alto ba la pyndonkam ha kane ka kam bymman la kurup bad wanlam noh shapoh Jowai Police Station na ka bynta ban pynlong shuh shuh ïa ka jingtohkit.
