Shillong, Nailar 22
Ka Shillong Lajong FC ka la jop suk ïa ka Malki SC da 5-0 kol ha ka jingïalehkai jong ka Shillong Premier League 2025 kaba la long mynta ka sngi Thohdieng ka 22 tarik Nailar 2025 ha madan SSA.
Ki kol ka Shillong Lajong FC la ïoh ban thep nyngkong lyngba ka ‘corner kick’ da u Mebannangkiew Thabah ha ka minit ba 31.
Hadien sa u Emanbha Marbaniang u la ïoh ban thep ar tylli ki kol ha ka minit ba 39&51, kawei na ka ba wanphai bad kawei na kaba pyrshah.
U Ribor L Lyngkhoi u la lah ban thep kol na ka ‘cross’ ha ka minit ba 47, bad u Firstborn Khongsit u la thep kol da ka khlieh lyngba kaba wan na ka ‘corner kick’ ha ka minit ba 84.
Ka jingïalehkai kaba khlaiñ bor jong ka Shillong Lajong ka la pynlong ïa ka ban jop da kaba suk, ha kaba ka Malki SC ka la ïakhun tyngeh ban thaw ïa ki lad ban thep kol hynrei kam shim la lah pynurlong.
U ‘rang apkol ka Malki, u Franklin Surong u la lah ban ïada bha haduh lai sien ha kaba sdang jong ka jingïalehkai hynrei um shym la lah satia ban khanglad ïa ka jingïalehkai jong ka Lajong.
Ka jingjop ka la rah ïa ka Shillong Lajong ha ka kyrdan ba-ar ha ka thup ïalehkai da kaba ïoh 4 poiñ, hadien ka Nangkiew Irat kaba la ïoh 6 poiñ. Ka Malki SC ka kamai 3 poiñ, ka ïakhaid bad ka Sawmer bad ka Mawlai.
Ka jingïalehkai ka ban long ha ka 23 tarik Nailar 2025, ha ka por 4:30 janmiet ka long, ka Langsning kan ïakhun pyrshah ïa ka Rangdajied United. Kane ka jingïalehkai kan long ka jingïakhun kaba itynnad hapdeng ar tylli ki kynhun ba pawnam.
