Mawkyrwat, Nailar 22:
U Bah Renikton Lyngdoh Tongkhar, MLA ka Mawkyrwat ryngkat u Bah B.Mawlong , Deputy Commissioner, SWKHD , ka kong Ïadarisha Majaw, Director jong ka tnat Arts & Culture, Shillong bad kiwei kiwei ki ophisar ha ka 22 tarik u Nailar 2025 ki la leit ban jurip ïa ki lai tylli ki jaka jong ka sorkar hapoh ka thaiñ Mawkyrwat na ka bynta ban tei ïa ka Auditorium cum Cultural Centre lyngba ka tnat Arts & Culture.
Ha kane ka sngi na ka liang u MLA bad ki bor Distrik ki la ïoh ban leit peit nyngkong ïa ka jaka ha Laitlawsang hajan ka Mini Secretariat, ha Domtynrong kaba hap hapoh ka shnong Mawlangwir bad kaba lai ha ka shnong Mawmerang.
U Bah Renikton Lyngdoh haba kren sha ki lad pathai khubor u la ong ba hadien ka jingjurip ïa kine ki jaka haduh mynta kim pat rai ïa kano ka jaka ban tei ïa kane ka Auditorium hynrei kin hap ban kren bha shwa bad peit ïa ka jaka kaba ïahap bad ka jinglut jingsep.
U Bah Renikton u khmih lynti ruh ba lyngba ka jingïatreilang jong baroh ki tnat sorkar shen kan sa don noh la ka jong ka Auditorium kaba donkam bha bad ka bym pat don hapoh ka distrik.
