Guwahati, Nailar:
U Myntri Rangbah ka Assam, u Himanta Biswa Sarma, u la pynpaw ïa ka jingsngewkhia kaba jur halor ki jingma kiba ïadei bad ka jingshngaiñ ha shilynter ka khappud Indo-Bangladesh ha ka distrik Dhubri, da kaba maham jur ha ki lynti ba pynïasoh bad ki jylla kaba eh bha na ka jingshah ktah ha ki khappud.
Haba kren sha ki lad pathai khubor, u Myntri Rangbah ka jylla Assam u la ong ba ha ka jingleit jong u dang shen sha Dhubri, u la ïohi ïa ki jingthoh ha ki kynroh kiba kyntu ïa ki nongshong shnong ban pyni ïa ka jingïeng hala ka nongrim ïa ka Bangladesh.
Ha kajuh ka por, ki jingïakynad kiba thymmai ki la mih ha Dhubri hadien ba ki nongshong shnong jong ki shnong khappud ki la ïathuh ba ki la ïoh pdiang ïa ki phone bad ki khubor byrngem ba la kynnoh ba ki dei na ki riew shimet kiba ïadei bad ka Jamaat-e-Islami (JeI) kaba don ha Bangladesh.
Ki nongshong shnong na Lakhimari bad Bishkhowa kiba hap hapoh ka jingkhmih jong ka Golakganj Police Station, ki la ong ba ki jingbyrngem, kiba la lap na u nombor jong ka ri Bangladesh, ki la maham ïa “ka jingma kaba shyrkhei” lada don mano mano ba ïarap ïa ki pulit ha kaba kem ïa ki briew.
Kine ki briew kiba la phone ki la byrngem ruh ban thang ïa ki ïing ki sem kiba don ha ka thaiñ khappud.
Kane ka jingpyrshang ban pyntieng pynsmiej ka dei hadien ka jingjia ha ka sngi shwa ban rakhe ïa ka sngi laitluid ha kaba ki pulit ka Golakganj ki la kem ïa uwei u samla na ka thaiñ khappud Indo-Bangladesh uba rah ïa ka Sim Card jong ka ri Bangladesh bad ka lama ka ri India.
Ki kynhun pahara ki dang buddien bha ïa ki jingjia kiba ap jingma ha ki bynta khappud halor ka jingthmu ban pynmih ïa ka jingkulmar ha ka thaiñ barit paid ha khappud Dhubri.
