Shillong, Nailar 24
Ka Langsning FC ka la lah ban pynliem noh ïa ka Rangdajied United FC da 4-0 kol ha ka lympung ïalehkai Shillong Premier League 2025 ha ka sngi Saitjaiñ ha SSA Stadium kaba ha First Ground, Polo.
U Damonlang Pathaw (27′, 44′) u la thep ar kol, katba ïa kiwei pat la thep da u Nelson Rymbai (6′) bad u Dajiedlang Wanshnong (64′) na ka bynta ban pynlong ïa ka Langsning FC ban kiew sha ka kyrdan kaba lai ha ka miej ïakheiñ point.
Ha shwa kane ka jingïakhun, kine baroh artylli ki kynhun kim shim la lah ban khur satia ïa la ki nam jop ki jong ki, ha ki jingïalehkai ba nyngkong hadien ba ka Langsning FC ka la ïakhaid da mar 1-1 kol bad ka Mylliem, katba ka Rangdajied ka la ïakhaid bad ka Shillong lajong khlem da lah ban pynkhih jar.
Ka kol ba nyngkong na ka bynta ka Lasngning FC ka la wan lyngba u Nelson ka la long kaba u la khyrwit jam bha kham najngai, kaba la pynlong ïa u Meshan Banjop rangapkol ka Rangdajied United ba un ym lah ban khanglad ïa katei ka bol.
Hadien ba la ïoh ban thep ïa kane ka kol, ka Langsning FC ka la ïai bteng ba kan tynjuh borbah ïa ka RUFC, kaba pynlong ïa ka ba kan ïoh ba kan thep ïa ka kol kabar lyngba u Damonlang .
Satang khyndiat por shwa ba ka jingïakhun kan jam sha ka jingïashong thait, ka Langsning FC ka tehlakam ïa kane ka jingïakhun ka, hadien ba ka la ïoh ba kan thep ïa ka kol kaba lai, kaba la wan hadien ba u Chusrang Sangma u la lah ban pynbuh ïa ka bol sha u Damonlang, kaba wat hadien ba la buddien da u defender jong ka RUFC, pynban u la ïoh ban pynkhih biang pat ïa ka jar.
Haba wan ban bteng ïa ka kylla miet, ki rangïalehkai ka RUFC ki la pyrshang ban kyntiew ïa la ka jong ka rukom ïalehkai jong ki, ha kaba la don ki khep ba ki rangïalehkai kum u Everson Malieh, Benny V. Khriam bad u Deepson Tokbi ki la ïoh ïa ki kabu ksiar, tangba kim shim la lah ban pynurlong sha ki kol kaba bunsien ka bol kaba ki ïoh ka la shu lait sharud bad ha ka por ba la pynjlan ïa kane ka jingïakhun, ka free-kick kaba la ïoh ban shut ka la dei na diengkol.
Ka kol kaba saw lyngba u Dajiedlang Wanshnong, ïa kaba ym slem u la wanphai noh sha ka ben shong (substitute). Da kane ka jingjop, ka Langsning FC kan khur 4 point na ki arsien ïalehkai ba ka la dep, katba ka RUFC ka dangsah 1 point.
Ka jingïakhun ka ban wan jong kane ka lympung ka SPL kan long ga ha ka 27 tarik mynta u bnai, ha kaba ka Laitkor SC kan ïakhun pyrshah ïa ka Mylliem SC, ha ka por 4:40 nohphai sngi.
