Jowai, Nailar 24
Ka Mookyndur ka la khur jingjop ha ka Super Division (Kelsiroy Pala Memorial), katba ka Thadmusem bad Tyllilang-i Moobakhon ki la khur jingjop ha ka 2nd Division (Joybell Suiam Memorial Football Tournament) ba la pynïaid da ka Thadlaskeiñ Sports Association (TSA).
Ha ka jingïalehkai Super Division kaba la long ha ka sngi Saitjaiñ ha madan Wahïajer Multi Sports Complex, ka Mookyndur ka la pynliem noh ïa ka Niriang da 2-1 kol.
Kane ka nam jop ka la wan urlong lyngba u Monday Nelson Lamare uba la thep marwei ar kol na ka bynta ka Mookyndur ha ka minit kaba 15 & 25, hynrei na ka Niriang la thep da u Chirup Kharmuti (30).
Shwa ïa kane, ka jingïalehkai jong ka 2nd Division, ka Thadmusem ka la pynliem noh ïa ka Nongkhroh Sohbar da 2-1. Ïa ki kol jong ka Thadmusem la thep da u Kermi Dkhar (6), Ebormi Mukhim (47), katba na ka Nongkhroh Sohbar la thep da u Plielad Myrboh (37).
Haba phai sha kawei pat ka jingïalehkai kaba bud, ka Tyllilang-i Moobakhon ka la jop da 6-2 kol ïaka Myntoilang-i Bamkamar. U Dashaniah Rymbai u la thep ar kol ha ka minit kaba 2 & 67, katba ïa kiwei pat la thep da u Sambormi Ramut (21), Chibor Rynjah (26), Mewan Myria (63) bad Rikilur Dkhar (70). Na ka Myntoilang-i Bamkamar la thep da u Samuel Challam (55) bad Bankerlang Suting (65).
Ha ka lah sngi U Blei ka jingialehkai ha ka 2nd Division kan long hapdeng ka Bamkamar wah pyrshah ïa ka Thadmynri ha ka por 10 baje mynstep, katba ka Hunlang Moobakhon ïa ka Lumkynsaw ha ka por 12 baje mynsngi. Ha ka Super Division, ka Lumphyrnai Sohphoh kan ïakhun pyrshah ïa ka Pohskur Phlongingkhaw ha ka 3 baje nohphai sngi.
