Shillong, Nailar 24
U nongaibuit jong ka Khasi Students Union (KSU) Barak Valley u Bah Wanbor Pdang uba dei ruh u General Secretary ka Barak Valley Khasi Jaiñtia Welfare Oraganisation kaba don ha jylla Assam u la ïathuh ba uwei u rangbah Khasi u la mareh klumar hadien ba ki khar Muslim ki la thmu ban ot na u ryndang ha jaka rep tympew ha shnong Khalakhal-1.
Haba ïoh ban ïakren lyngba ka phone, u Bah Wanbor u la ïathuh ba ki hynriew ngut ki shynrang Khasi kiba na ka shnong Khalakhal-1 ki la leit rep tympew mynha ka 15 tarik mynta u bnai ha kawei ka bri kaba jngai kumba 2 kilometre hynrei kine ki khar Muslim kiba don kumba 30 ngut kiba sah ha katei hi ka thaiñ ki la wan byrngem ban mih noh na katei ka jaka.
Kumta kine ki Khasi ki la ai nia ba kam lah ban long ba kin mih namar ki la shong la sah la slem ha kane ka jaka, hynrei ha kata ka por kine ki khar Muslim ki la sdang ban ktah kti bad sei da ka suloi ki wait kat haduh ba kine ki shynrang Khasi ki la hap ban phet noh ïalade.
U la ïathuh ha ka por ba ki la mut mareh ki la ïoh bat ïa u Bah Rahul, kumta ki la sei da ka wait ban ot na u ryndang hynrei haba u ïoh ban ïakhun, ki la mut ban pom na tyrpeng hynrei namar ka jingsheptieng u la ïoh ban phet noh.
Kumta ïa une u rangbah uba la mynsaw la phah sumar noh sha Silchar Medical College bad mynta u la mih ban leit sumar noh sha ïing.
Shuh shuh u Bah Wanbor u la pyntip ba ka shongsuk shongsaiñ ka la wanphai biang hadien ba ki bor district ki la pynkhlaiñ ka jingpahara.
U la ïathuh ba ha kane ka shnong Khalakhal-1, ki don kumba 50 tylli ki ïing. U la pynpaw ka jingai khublei ïa ka KSU Sengkmie kiba la wan naduh Shillong ban wan hiar sha kane ka shnong ban ai mynsiem ïa ki Khasi kiba sah ha Barak Valley.
Shuh shuh u suba ba kine ki briew kiba leh ïa kane ka kam runar ki lah ban ki dei ki briew ki bym dei na India namar lada dei kiba la kha ha India kin long kiba jai jai khnang ban im suk im sain ha katei ka thaiñ.
