Kum ki briew kiba tip briew tip Blei, ngi dei ban burom ïa ki kmie ki kpa.Nangta ngi dei ban ñiew burom ïa ki riew tymmen kiba la heh ka rta. Shuh shuh ngi dei ban burom ïa ki lok ki jor bad ïa ki para marjan marpa.Dei ruh ban burom bad ïa ieit ïa ki para briew. Ka jingïaieit bad ïa burom markylliang para briew ka long ka kam bah kaba bha tam eh.
Haba ngi burom ïa kino kino ki briew ngi dei ban niew burom ïa ka kyrdan pule ne ïa ki Syiem ki patsha – ka burom ka dei ban leit nyngkong eh ha ki riew tymmen. Kaba leh burom ïa kiba heh kyrdan ne kiba long nongmihkhmat ka long ka jingleh burom ban ioh jingmyntoi ïa lade.
Haba ngi burom ngi dei ban burom ïa ka rta bad ka jinglong tymmen, ym ïa kiba don kyrdan ha ka pule puthi. Ngi dei ban burom ïa kiba la iohi nyngkong eh ïa ka sngi bad u bnai. Katba ha ngi ki briew ngi kham burom ïa kiba don spah don phew. Bad ngi kyntait ban ai burom ïa kiba duk ba rangli. Haba ngi burom ngi dei ban burom ïa ki riew tymmen.Kane ka long ka jingshisha ha khmat u briew bad u Blei.
C. B. Iawphniaw
