Guwahati, Nailar:
Ki briew kiba la suba ba ki dei ki nong Bangladesh bad ki Miya kiba dei trai na Bangladesh, ki don mynta ha ki kam ba kongsan ha ki 30,000 tylli ki Mosque ha Assam, la kam u heh nongaiktien jong ka Assam Bharatiya Janata Party (BJP), u Dr Mominul Awal.
Haba kynthoh jur ka Jamiat Ulama-i-Hind bad ïa u heh nongïalam jong ka u Maulana Mahmood Madani halor ka jingkren jong u ban dawa ban weng noh ïa u Myntri Rangbah ka Assam, u nongïalam ka BJP, u la ong, “Kumno phi (Mahmood Madani) phi nud ban kren kumne? Ki la don palat 30,000 tylli ki Mosque ha Assam bad kiba bun ki dei kiba hap hapoh ka jingkhmih jong ki Muslim kiba dei ki Miya, ki nong Bangladesh. Ym tang ki mosque, ki dang synshar ïa ki Madrasa, bun ki kynhun seng jong ki Muslim ha ka jylla.”
“Hashwa ha ka por jong ka Congress, u Myntri Rangbah ha katei ka por, u Hiteswar Saikia u la pyntip sha ka ïingdorbar Assam ba ki don 30 lak ngut ki nong Bangladesh kiba la kiba la sah beaiñ ha ka jylla. U Jamiat Ulama-i-Hind u la byrngem ruh ïa u Saikia ba un nud ban pynkhyllem ïa ka sorkar jong u tang hapoh shiphew minit. Mynta ki dawa ban pynhap biang ïa u Myntri Rangbah ka Assam u Sarma. Kumno phi nud ban pynmih kum ïa kine ki jingthoh?’ la ïathuh u Awal ha ki nongthoh khubor.
