Shillong Nailar 24
U Bah Gavin Miguel Mylliem u ba dei ruh u MLA ka Sohra Konsti-twensi u la ong ba mynta la jan 12 snem kynthih ka Jylla Meghalaya kam shem ïoh shuh ïa ki ophisar, IAS napoh ka Jylla jong ngi.
U la pynpaw ïa ka jingsngewsih namar ba mynta ki samla kim shem la don shuh kiban ïoh ïa ka kyrdan ophisar, IAS na ka Jylla.
“Dei halor kane ka bynta ba ki khun samla ki donkam ban kyndit bynriew khamtam ha kine kipor ba mynta. Ngi don ïa ki rynsan ba bit ba biang kiba na ka liang ka Sorkar ka don ban tyrwa. Ki prokram ai jinghikai bad kiwei kiwei de” la ong u bah Gavin ha ka prokram pynkupburom ïa ki samla ba la pass bha ha ka SSLC bad ka HSSLC.
U Bah Gavin u la kyntu jur sha ki samla ba kin trei minot namar ym don lynti da kum wei pat, lait na ka jingtrei minot jong phi ban pyntikna ba phin pynurlong ïa kata ka thong ba phi don hakhmat duh.
U la ong “Haba phai sha ki 40 snem ba mynshwa, lehse ka pass certificate ka lah biang ban pyntikna ban ngin ïoh ka kam ka jam ha kito ki por ba la leit, hynrei ngi sngewthuh ba ha kane kajuk jong ngi kaba mynta ka pass certificate kan nym lah ban pyntikna ïa kata ka jingïoh kam ïoh jam bad kum ki briew ngi donkam ban treiminot khnang ban ngin lah ban pynurlong ïa kata ka thong”.
Ha kane ka juk ba mynta ka sorkar kam lah shuh ban aikam sorkar ïa u wei pa u wei u ba la pass ïa ka degree bad kumta ter ter bad dei halor kane ka bynta ban na ka liang ka Sorkar Jylla ka ju pylong ïa ki prokram ai jinghikai kiba bun, ban pynshlur ïa ki khun samla ban ïeng ha la ki jong ki kjat, la ong u Bah Gavin.
Shuh shuh u la ong ruh ba ki samla kidei ban pyndonkam hok ïa ka sap ba u Blei u la ai sha ki, ba kin long shisha kita ki khun samla ki ban noh synñiang na ka bynta ka jingkiew arted jong kane ka Jylla Meghalaya.
U la kyntu ruu ba kum ki khun samla kiba la don ïa ka certificate ba la pass ha ka klass 10 bad klass 12 ba ka la dei ruh ka por ban pyntikna kaei kaba ki don ha ka jingim jong ka jingthmu kidei ban don noh ïa ka thong bad ha kane ka jingïaid lynti jong phi ha ka thong phin long kita ki samla ki ban skhem ka jingmut jingpyrkhat, phin ïaineh, phin ïaishah, phin long disiplin bad khamtam eh ba phin long kiba sngewrit.
Nalaorkta, u la ai mynsiem ïa ki samla ba la shah pynkupburom, kiba la trei shitom ha u ne u snem ba la dep.
