Shillong, Nailar 24
Ka All India Football Federation (AIFF) ka la hap ban wad da kawei pat ka jaka ban pynlong ïa ka jingïalehkai ba kongsan jong ka India ka ban ïakhun ïa ka AFC Asian Cup 2027 (qualifier) pyrshah ïa ka Singapore hadien ba ka Sree Kanteerava Stadium kaba ha Bengaluru ka la shah kyntait ha ka Asian Football Confederation.
Ka India kan ïakhun pyrshah ïa ka Singapore kaba long ka kynhun kaba hakhmat eh, ha ka jingïalehkai ha la ïing ka ban long ha ka 14 tarik u Risaw mynta u snem. Katkum ki tyllong khubor ba la ïoh lum, la ong ba ka AIFF ka la pynbeit ïa ka Sree Kanteerava Stadium ban pynlong ïa katei ka lympung ïaknieh, hynrei katei ka jaka kam shym la ïoh ïa ka jingbit na ka AFC.
La sngewthuh ba ka AFC ka la dep pynlong ïa ka jingjurip da u match commissioner jong ka, ha kaba la pynpaw ïa ki katto katne ki jingeh.
“Ka madan kam long kaba biang, bad bun kiwei pat ki daw ruh kim long kiba biang ban pynlong ïa ka jingïalehkai bar ri,” la pynpaw uwei na ki heh ka AFC. “Ka Bengaluru FC ka ju shim khia ïa ka madan na ka bynta ki jingïalehkai ha la ïing (ha ka ISL), hynrei da ka jingsangeh noh ka klob ïa ki jingtreikam, la lap ba ka jaka ïalehkai kam long shuh kaba biang. Ka jingïoh rung kyrpang sha ka madan ruh ka la long ka jingeh. Mynta la bthah ïa ka AIFF ba kan ai jingmut na ka bynta ban ïoh noh da kawei pat ka madan.”
Kumba ka long mynta ka Goa bad ka Shillong ki la mih kum ki lad ba thymmai na ka bynta ka AIFF namar ki jaka ïalehkai ki long kiba la pynkhreh n aka bynta ki jingïalehkai phutbol bar ri.
Ka Shillong ka la pynlong teng mynta u snem ïa ka jingïalehkai ka wat kaba khatduh (final round) jong ka Asian Cup pyrshah ïa ka Bangladesh ha u Lber bad ïa ka jingïalehkai (group stage, quarter bad semi final) jong ka Durand Cup mynta u snem. Katba ka Nehru Stadium ha Fatorda ka la ïoh ban pynlong ïa ka jingïalehkai ha la ïing jong ka FC Goa pyrshah ïa ka Al Seeb ha ka AFC Champions League (Two qualifier) ha ka 13 tarik mynta u bnai.
Ka India ka ïakynduh ïa ka jingeh kaba khraw ban ïoh rung sha ka AFC Asian Cup 2027 ha Saudi Arabia hadien ba ka la ïoh ban khur tang shi poiñ na ki ar tylli ki jingïalehkai ba nyngkong jong ka. Hapoh ka jingïalam u Manolo Marquez kum u coach, ka India ka la ïakhaid ïa ka jingïakhun nyngkong pyrshah ïa ka Bangladesh bad nangta ka la shah thep kol ha ka minit kaba khatduh pyrshah ïa ka Hong Kong.
Kumba ka long mynta u Khalid Jamil um shimti nyngkong kum u coach ïa ka India ha ka jingleit ïakhun pyrshah ïa ka Singapore ha ka 9 tarik u Risaw. Ka India ka la don ha ka kyrdan ba shatrai, katba ka Singapore ka la bat ïa ka kyrdan ba hakhlieh da kaba kamai 4 poiñ. Te kumta ban ïoh rung sha ka AFC Asian Cup 2027 ka ban long ha ka Saudi Arabia, kin dei tang kito ki kynhun ki ban bat ia ki kyrdan ba hakhlieh na baroh ki group.
