Tura Nailar 24
Ka Confederation of Meghalaya Social Organisations (COMSO) ka la pan jingtohkit halor ka jingkhaii bad shalan masi beaiñ lyngba ka Jylla Meghalaya hadien ba la lap ïa kawei ka kali kaba kit ïa ki masi da ki kot ki sla ba thok.
“Ha ka janmiet, ha ka por kumba 3:10 PM, ki paidbah kiba la peitbniah bha ki la bat ïa kawei ka kali Mahindra Pick-Up Van kaba don ïa u Registration Nombar AS 34 C 1002 ha Nidanpur, West Garo Hills Distrcit katba ka dang kit masi beaiñ bad khlem ki kot ki sla kiba biang. Ia kane ka kali la lap ha kapor ba ka wan ban kit ïa ki masi na Jaleswar, Assam, hapoh ki kot ki sla ki bym lah ban pynbiang ïa ki jingdonkam ba la buh katkum ka aiñ” la ong ka COMSO.
Ka COMSO ka la pynpaw ba ki kot ki sla ba la kurup watla la pynmih da ka Jaleswar Go-Haat Committee (Assam) hynrei ki pynshisha tang ïa ka jingdie hapdeng ki riew shimet.
“Kine ki syrnot kim ïaryngkat bad ki jingbit ban ïaid lyngba katkum ka aiñ, ka jingpynlait ban peit bniah ïa ka koit ka khiah, lane ki laisen kit ba la bthah katkum ki kyndon kit mrad, 1978, ki kyndon kit mrad da ka kjat, 2001 bad kiwei kiwei ki kyndon katkum ka aiñ ïada ïa ki mrad, 1960” la ong ka COMSO.
Ka COMSO ka la bynrap ba ka jingleit jingwan be-aiñ jong ki masi ka la pynmih ïa ki jingsngewkhia kiba jur namar ka long ka jingpynkheiñ ïa ki kyndon kit masi, ka jingkhaii tuh kaba lah ban jia sha shiliang pud bad ka jingkhaii be-aiñ ïa ki masi bad ki jingma ha ka aiñ bad ka shongsuk shongsaiñ.
Halor kane la ujor FIR da ki nongshong shnong ha Bogulurbhita Out-Post ha WGH halor kane ka kam.
“La kdew shuh shuh ba ïa kine ki mar be-aiñ bunsien ki rah da ki kot ki sla ki bym biang ne kiba la shu shna thok kiba ym biang katkum ka aiñ ka Jylla Meghalaya. Ki syrnot ba la ïoh kurup (Form G, dated Nailar 18, ba la ai ha Jaleswar, Assam) ki shu pyni ïa ka jingthied hynrei kim ai bor ïa ka jingkit jingbah hapdeng ki Jylla shapoh Meghalaya. Ki paidbah ki la pynrem jur ïa kane ka jingleh be-aiñ” ong ka COMSO.
Ka CSO ka la dawa ban register FIR katkum ki kyndon kiba biang jong ka IPC, ki aiñ ban pynneh pynsah ïa ki masi bad ka aiñ ban ïada na ka jingshah lehbeiñ ki mrad bad kumjuh ruh ban kurup noh mardor ïa ka kali bad ki masi.
Ki la pan ruh ban tohkit bniah ïa ka bynta jong ki nongkhaii, ki nongshalan bad ki nongthied kiba donkti bad kumjuh ruh ban pynkhlaiñ ïa ka jingpahara ha khappud ban khanglad shuh shuh ïa ka jingkhaii masi beaiñ sha Jylla Meghalaya.
