Tura, Nailar 24
Ka CEC jong ka Garo Students Union (GSU) hapoh ka jingïalam Tengsak ryngkat bad ka NESO ki la dawa na ka Sorkar ban thaw kyrkieh noh ïa ka Special Task Force (STF) bad kumjuh ruh ban pynïeng noh ïa ki khyrdop talasi ban peit bniah ïa ka jingwan rung kyrthep jong ki briew ba nabar sha ki bynta jong ka rilum Garo.
Kine ki ar tylli ki seng (GSU CEC, NESO) ha ryngkat ka GSU Western Zone South ha ka sngi Saitjaiñ ki la leit jngoh ïa ki jaka khappud kiba don jingma ha South West Garo Hills kumjuh ruh ki la ïakynduh ïa u Deputy Commissioner jong ka South West Garo Hills ban ïakren halor kane ka kam.
Ha ka por jong ka jingleit jngoh ïa ki jaka ba kham long laitlan bad kham suk ka ïoh rung jong ki briew ba nabar, la lap ba kiba bun ki jaka kiba hap hapoh u pud u sam jong ka Sixth Schedule ki dei kiba la shah kyntur pud la na ki briew na Bangladesh lane na ki nong Assam.
Katkum ka jingpynpaw na u President ka GSU Sengkmie u Tengsak G Momin, na ka liang jong u Deputy Commissioner jong ka South West Garo Hills ruh u la kubur ïa ka jinglong jingman kaba khia ha ka jingïakynduh bad ha kaba u la pyntip ba ka jingtalasi la ju leh bad dang donkam shuh shuh ïa ki jingtip kaba kham bniah.
“Tang ka jingtalasi ha ki surok bad ki surokbah kam myntoi ne ïarap namar kiba bun ki briew ki pynrieh ïa kine ki nongwan rung tuh ha ki ïing ki jong ki naba ki dei na kajuh ka jaidbynriew. Ki don ruh ki khep ba ha kaba ki nongïalam shnong ne ki Nokmas ki pynbiang ki kot ki sla sha ki briew ba nabar da kaba pynshisha ïa ka jingithuh ïa ki kum ki nongshong shnong ba la slem ha ki jaka jong ki,” la pyntip u deputy commissioner.
Haba pynkynmaw ïa ka jingbthah ba la ai da ka Sorkar Pdeng ban thaw ïa ki kynhun treikam ba kyrpang sha baroh ki Sorkar Jylla ban ïaleh pyrshah ïa ka jingwan rung beaiñ, u Tengsak u la buh jingkylli lada ka hukum na ka bynta kajuh ka la mih na ka Sorkar Meghalaya bad lada ym dei, balei ka dang sahkut ha ka jingthiah lyngngai.
“Ka Sorkar Meghalaya kam treikam satia halor kane ka mat. Kumba long ka KSU ha Khasi Hills, ka GSU, Western Zone South ruh ka ju pynlong ïa ki jingkhynra man ka por ban lap ïa ki nongwan rung beaiñ. Ngin dang bteng bad ka jingtalasi bad ruh ban shim ki lad ki lynti ban pynbor ïa ki bor pynïaid district ban trei,” la ong u Tengsak.
Ha kajuh ka por, haba pynpaw biang ïa ka jingthmu jong u nongïalam ka GSU halor kane ka kam, u Nongaiktien ka NESO u la ong ba la dei ban thaw ïa ka Special Task Force naduh mynshwa ban peit bniah ïa ka jingwan rung be-aiñ kaba la jyllei bad kaba nang kiew sha ka jylla.
“Nga kwah ban kyrpad ïa ka Sorkar Jylla ba kan thaw noh mardor ïa ka STF katkum ka jingbthah ba la ai da ka Sorkar Pdeng. Ka dei ban trei mardor ban talasi bad lap ïa ki briew kiba wan rung beaiñ bad kumjuh ruh ban pynthikna ban phah leit phai sha ki jaka na kaba ki wan”, la ong u nongïalam ka NESO.
