Guwahati, Nailar 24
Ka Directorate General jong ka GST Intelligence (DGGI), Guwahati Zonal Unit, kala kem ïa u Shiv Kumar Mittal, u trai jong ka GM Coke ha Byrnihat, halor ka jingkynnoh ba um shim la siew ïa ka khajna (Goods and Services Tax (GST) kaba palat ïa ka T.150 klur.
U Mittal u la shah kem na Tinsukia ha ka janmiet jong ka sngi Thohdieng hadien ba ki nongtohkit kila lap ïa ki sabut ïa ki kot ki sla kiba la shu shna thok. Ki ophisar kila ong ba u la thied ïa u Coke na ki katto katne tylli ki karkhana kiba la pynïaid be-aiñ ha ka jylla Meghalaya bad buhrieh ïa ka jingthied lyngba ki kot kiba la shu shna thok kiba la pynmih ha ka kyrteng thok jong ki kompani, kiba bun kiba la rejistar da kaba pyndonkam ïa ki kot jong ki briew kiba duk bad ki riew shimet.
Ki tyllong khubor kila ïathuh ba u Mittal u la ïoh ïa ki kot kiba la shu shna thok kaba la palat ïa ka T.150 klur ban buhrieh ïa ka jingdie jingthied ban kiar na ka jingsiew ïa ka khajna. Ka kyrteng ka jong u kala mih hadien ba kala don ka jingtohkit halor ka jingjur palat ki briew kiba shna thok ïa ki kot ki sla, kaba la paw hapoh Guwahati ha kaba 4 ngut ki briew kila shah kem.
U Mittal u don hapoh ka jingshah tohkit ban lap shuh shuh shaphang kane ka kam be-aiñ bad ïa kiwei kiwei ki briew kiba ïoh jingmyntoi na ka jingkhaïi be-aiñ ïa u dewïong bad u Coke.
Ka DGGI kala ong ba kane ka jingkem ka pyni shai ba kala nang pynjur ïa ka jingkhynra ka jong ka pyrshah ïa ka jingshna thok ïa ki kot ki sla ban kiar ïa ka jingsiew khajna bad ïa ki kam khaïi be-aiñ hapoh ka thaiñ shatei lam-mingni.
Ha kine ki 8 bnai kiba la dep, ka Directorate General of GST Intelligence (DGGI), Guwahati Zonal Unit, kala ïoh kem 11 ngut ki riew shimet kiba la kiar ban siew ïa ka khajna GST ha ka jylla Assam, Meghalaya, Nagaland, Arunachal Pradesh bad West Bengal.
Katkum ki tyllong khubor, une uba shah kem u la donkti ha katei ka kynhun kaba la ïalam ha ka ban shna thok ïa ki kot ki sla kaba la palat ïa ka T.1000 klur.
“Kane ka dei tang kaba jinglap kaba malu mala. Ka jingtohkit ka jong ngi ka dang ïalam ïa ngi sha ki kyrteng jong ki briew kiba pawnam. Ngin shim ïa ki lynti kiba khlain bad kiba tyngeh pyrshah ïa ki khlieh nongpynïaid bad ki karkhana Coke be-aiñ kiba treikam ha kylleng ki thaiñ nongkyndong jong ka Meghalaya bad Arunachal Pradesh,” la pynpaw ki ophisar.
