Norway, Nailar:
U khun ka syiem jong ka Norway, uba la don 28 snem ka rta, u la shah pynngat kyndon halor ki jingkynnoh ba u don kti haduh 4 tylli ki kam batbor ia 4 ngut ki kynthei bad u don kti ruh ha ki katto- katne ki kam thombor, bad u lah ban shah set patok haduh kumba 10 snem kynthih, la ong u nongmudui ha ka Sngi Nyngkong.
U Marius Borg Hoiby, uba la kha na ka jingïadei shwa ba ka Syiem Mette-Marit, kan ïa poi kha bad u Syiem Haakon, u la don mynta hapoh ka jingtohkit jong ki bor ka aiñ, naduh ba la kem ïa u, ha ka 4 tarik u Nailar jong u snem ba la leit, haba iadei bad ka jingsuba ba u la thombor ïa ka samla jong u hi.
La ong ba utei u khun jong katei ka syiem, u la shah kynnoh ba u la leh beijot ia saw ngut ki kynthei katba ki dang thiah. Ym duna ia ka lai tylli ki mukotduma, u la iakynduh ia kitei ki kynthei ha kajuh ka sngi bad u la iathiah shongkha da kaba ia mynjur lang shwa ki jingshah kynnoh leh be-ijot, la ong ka nongmudui, ka Sturla Henriksbo ha ki nongthoh khubor.
U Hoiby u shah kynnoh ruh ba u la ring dur ‘video’ ia ka met jongki, khlem ka jingtip jongki bad kaba la ktah ia ka long rynïeng jongki ha ka imlang- sahlang bad khamtam ha ki por ki ban wan.
Ka Henriksbo ka la ong ba ki nongtohkit ki don ia ki video ba la ring da utei hi u khun jong katei ka syiem, ia kiba la lah ban pynsakhi ia katei ka jingleh kam be-aiñ jong u pyrshah ia kitei ki 4 ngut ki kynthei.
Hynrei, la ong ba kine ki saw tylli ki jingshah leh beijot, kim shym la jia ha kajuh ka por bad ha kajuh ka jaka, hynrei dei na kawei ka por sha kawei pat, kynthup ia ka jingsdang batbor jong u ia kawei ka kynthei ha u snem 2018, kumjuh ruh ha u snem 2023 bad kaba khatduh eh kaba la jia ha u snem 2024.
Kiwei pat ki jingshah kynnoh pyrshah ïa u Hoiby, ki kynthup ïa ka jingshah lehbeiñ ha ïing ha sem pyrshah ïa ka samla barim jong u bad katto- katne ki jingshah kynnoh ba u la leh be-ijot, u la pynthut ïa ka shongsuk- shongsaiñ jong katei ki samla, u la pynjot bad pynkheiñ ruh ïa ki hukum khang pyrshah ïa kawei ka samla barim jong u.
Hynrei dei tang ia kawei ka samla barim jong u, ka Nora Haukland, kaba u la pdiang ia ka jingleh tohmet, leh beiñ bad kaba u la pynjynjar ia ka bad met bad mynsiem haduh ka jingmut jingpyrkhat, ha ki snem 2022 bad 2023 mynba ka don hapdeng ka jingiadei bad u.
