Shillong, Nailar 24
Ka jingïaid lynti ka kynhun ki ‘thei ïalehkai Under-17 ka Nongjri Presbyterian Secondary School ha ka International Subroto Mukherjee Football Cup 2025 ka la poi sha kaba kut, hadien ba ka la shah rem noh ha ka Lal Bahadur Shastri Momorial HSS kaba na Kerala da 1-0 kol ha ka jingïalehkai quarter final ha ka sngi U Blei ha Dr. Ambedker Stadium, New Delhi.
Kane ka kynhun kaba la mihkhmat ïa ka Jylla ha katei ka lympung ha kaba ka la lah ban ïalehkai bha ha ka jingïalehkai group da kaba pynliem ïa ka International School Sports Organisation (ISSO) da 5-0 kol, kumjuh ïa ka Government Model SR Secondary School Sector 22 kaba na Chandigarh da 3-0 kol bad ïa ka Dadra and Nagar Haveli and Daman and Diu (DNH&DD) da 12-0 kol, pynban ha kane ka kynti ka la shah rem noh ha katei ka kynhun na Kerala, kaba la bat ïa ka kyrdan ba hakhlieh ha ka Pool-C.
Kumba ka paw ha kane ka jingïakhun ka Nongjri kam shym la lah ban khanglad ban pyllait na ka jingshah thep, hynrei ka shi kol ba la thep da ka Kerala ha ka minit kaba 63 ka la biang pura ban ïoh rung sha ka semi final.
Te kumta ka Jylla ka dangsah sa ar tylli ki ban mihkhmat sha katei ka lympung, kata ka Mawtneng U.P & SS (Ri-Bhoi) ha ka Under-15 Boys bad ka North Liberty HSS (West Jaiñtia Hills) ha ka Under-17 Boys, ki ban sa mih dangshen ban leit ïakhun sha Bangalore bad New Delhi.
