Tura, Nailar 24
U MDC ka Tura, u Bernard Marak u la kyrpad ïa u Myntri Rangbah ka jylla u Conrad K Sangma ban khot ïa ka jingïalang kaba kyrkieh na ka bynta ban ïakren halor ki jingkynnoh ba ka la don ka jingpyndonkam bakla ïa ka pisa kaba la thmu na ka bynta ki kam pynroi ha rilum Garo lyngba ka GHADC, kaba long ruh ka jingpynkheiñ jong ka Garo Accord kaba la ïasoi hapdeng ka Sorkar Pdeng, ka Sorkar Jylla bad ka kynhun ANVC.
“Ka pisa kaba 100.71 klur tyngka (special package) kaba la mang da ka Centre post-Accord ha u snem 2015-16, la kynnoh ba la phiah khlem da don ka jingpeit bniah ne jingkitkhlieh kaba biang. La pynkylla ïa ki projek kynthup ïa ka jingtei ïa ka Tribal Research Centre halor jong ka Council Museum ha Chidekgre, ka lynti kaba la wanrah bun ki jingkylli halor ka jingkyntur pud bad ka jingpyndonkam bakla ïa ka pisa ba la mang da ka Sorkar Pdeng,” la kynnoh u Bernard.
U la pynpaw ba ka Accord kam dei tang ka kot hynrei ka dei ka jingkular ïa ki riewlum jong ka jylla Meghalaya, khamtam ïa ka Garo Hill bad ka jingpynkheiñ ïa ka da ka EC ka GHADC bad ki MDC na ka liang synshar ka long ka jingpynjah burom ïa ka riti synshar bad ka jingshet kylla ïa ka jingshaniah jong ki paidbah.
Haba kyntu ïa ka jingïalang kyrkieh kaba kynthup ïa ki nongsoi, ka Sorkar Jylla, ka GHADC bad ka kynhun peit bniah kaba laitluid, u Bernard u la pan ban bishar bniah ïa baroh ki projek ba la bei tyngka na ka Sorkar Pdeng hapoh ka GHADC, ka jingtohkit ïa ki kontraktor kiba donkti ha ka jingpyndonkam bakla ïa ka pisa bad ban pynthikna ïa ki kaiphod audit bad ki kaiphod ba la shimkhia ba la aiti sha u Lat bad ka Sorkar Jylla.
“Ngin ym ailad ba ïa ki jingkular jong ka Accord yn tep hapoh ka jingsuk ha ka saiñ hima sima bad ka jingleh bymman ha ka liang ka pisa tyngka,” u la bynrap.
