Guwahati, Nailar:
U Myntri Rangbah jong ka Arunachal Pradesh u Pema Khandu, u dei u Myntri Rangbah uba wan ba-ar ha ka jingriewspah ha ri India, ha kaba ka jingdon jingem kaba la pynbna, ka long T.332.56 klur, ong ka kaiphod jong ka Association for Democratic Reforms (ADR).
U Chandrababu Naidu, Myntri Rangbah ka Andhra Pradesh, u wan hakhmat duh ha ka thup jong kiba bun tam ki jingdon jingem, kaba la pynbna ba ka jingdon jingem jong u, ka long T.913 klur tyngka.
U Myntri Rangbah ka jylla Assam u Himanta Biswa Sarma u don ha ka kyrdan ba hynñiew bad ka jingdon jingem ba la pynbna ka long T.17.27 klur tyngka.
La batai bniah ruh ïa kiwei pat ki jingdon jingem jong ki Myntri Rangbah ha ka kaiphod.
U Myntri Rangbah ka Karnataka, u Siddaramaiah, u wan balai ha ka jingriewspah da kaba ïoh T.51.93 klur, bud pat sa u Neiphiu Rio jong ka Nagaland, ha ka kyrdan kaba saw, kaba long T.46.95 klur.
U Conrad Kongkal Sangma Myntri Rangbah jong ka Meghalaya, u la pynbna ïa ka jingdon jingem jong u, kaba kot sha ka T.14.06 klur, bad u Manik Saha jong ka Tripura, u don T.13.90 klur.
Ka kaiphod, ka pynpaw ruh ba ka Mamata Banerjee, Myntri Rangbah ka West Bengal, ka dei kaba duna tam ka spah, ha kaba ka jingdon jingem jong ka, ka long T.15. 38 lak.
Ka ADR bad ka National Election Watch ki la lum ïa kane ka jingtip na ki jingsmai ba la smai hi dalade jong baroh 30 ngut ki Myntri Rangbah ba mynta. Ïa ki Affidavit la ai shwa ka ilekshon ba la dep ban pynlong.
