Shillong, Nailar 24
U President ka Congress u Bah Vincent H Pala u la pynthikna ba ka seng kan sa mudui thymmai hakhmat ka ïingbishar Meghalaya High Court pyrshah ïa ki saw ngut ki MLA kiba la phet seng, kiba la pynïasoh ïalade bad ka National People’s Party (NPP) kaba don ha ka liang Synshar.
Katkum ka jingong jong u, kitei ki saw ngut ki MLA- u Bah Ronnie V Lyngdoh (Mylliem), u Dr Celestine Lyngdoh (Umsning), Bah Gabriel Wahlang (Nongstoiñ) bad u Bah Charles Marngar (Mawhati) ki don ka jingkitkhlieh ban shah pynduh ïa ka kam namar ka jingphet seng jong ki bad ka seng ka kut jingmut ban rah ïa kane ka kam shaduh kaba kut.
“Ngin sa ujor da ka jingmudui kaba thymmai pyrshah ïa ki saw ngut ki MLA na ka bynta ka jingphet seng,” la ong u Bah Pala uba dei ruh u MP barim ka Shillong.
“Ka All India Congress Committee (AICC) ka dang bishar bniah ïa kane ka kam bad ka la kut jingmut ban rah ïa kane ka kam shaduh kaba kut,” u la bynrap.
Kane ka jingkren jong u, ka long hadien ba ka ïingbishar Meghalaya High Court ha ka 13 tarik Nailar kala pynkut noh ïa ka dorkhas ba la mudui da u Nongïalam barim ka Congress legislative party (CLP) Bah Ronnie V Lyngdoh pyrshah ïa u Lamphang ka Ïingdorbar Thawaiñ u Thomas A Sangma halor ka jingkyntait ïa ka jingmudui ban weng ïa ki lai ngut ki MLA barim ka Congress namar ba ki la phet sha ka NPP.
Haba kylli, u Bah Pala u la ong, “Ki (MLA) ki don bha ha ka bynta ban shah mait kyrteng. Dei na kata ka daw ba ki la thied ïa u (Bah Ronnie) namar ki tip bha ba kim lah ban lait na ka jingshah mait kyrteng.”
U Bah Ronnie V Lyngdoh dang shen u la iehnoh ïa ka Congress kaba don ha ka liang pyrshah bad u la pynïasoh ïalade bad ka National People’s Party (NPP) kaba don ha ka liang synshar ha ka 20 tarik u Naitung.
Ka jingdon paid jong ka Congress ka la hiar sha u ‘nod’ ha ka ïingdorbar kaba 60 ngut da ka jingiehnoh kam dang shen u Bah Ronnie V Lyngdoh.
Ïa ka jingpynïasoh jong u Bah Ronnie Lyngdoh bad ka NPP la ithuh ruh da u Lamphang ka ïingdorbar u Thomas A Sangma. La pdiang pura sha ka seng bad kum u MLA ba pura ka NPP ha ka 5 tarik u Nailar.
Ka Congress ka la jop 5 tylli ki seat ha ka ilekshon sha ka ïingdorbar thawaiñ jong u snem 2023. Uwei na ki, u Saleng A Sangma, u la shah jied hadien sha ka Ïing Dorbar Lok Sabha na ka Tura seat, katba lai ngut kiwei pat u Dr Celestine Lyngdoh (Umsning), Bah Gabriel Wahlang (Nongstoiñ) bad Bah Charles Marngar (Mawhati) ki la pynïasoh noh sha ka NPP ha ka 19 tarik Nailar, 2024.
Ha kawei pat ka liang u Bah Pala u la pynbna ba yn sa don ka jingbujli ha ka liang ki nongkitkam jong ka seng ban pynthymmai bad pynkhlaiñ biang ïa ka jingdon jong ka, hapoh ka jylla.
Wat hapdeng ka jingshah kynthoh halor ka jinglong nongïalam jong u, u Bah Pala u la ïai bteng ba ka jingkylli jong u ban hiar shuki kum u president jong ka Meghalaya Pradesh Congress Committee (MPCC) kam mih satia.
