Shillong, Nailar 25
Ka kynhun jong ki runar bym lah ban ithuh ba la suba jur ba ki lah ban dei ki runar na Bangladesh kiba don kumba 10 ne 12 ngut, ki la lute ïa ki saw ngut ki briew ha ka surok kaba don hajan ka khlaw Sympah ha East Khasi Hills.
Katkum ka khubor kaba la ïoh na ki pulit la ong ba ha ka 21 tarik mynta u bnai, ha ka por kumba 12.45 shiteng synñia, ka kynhun ki runar ba la suba jur ba ki dei ki runar na Bangladesh kiba la rah ryngkat ki tiar kum ka wait ki la khang kdong ïa kawei ka kali kaba don saw ngut ki briew ha ki bynta jong ka surok hajan katei ka khlaw.
Ki saw ngut ki briew kiba don hapoh katei ka kali, kaba la shah khang lynti, ki kynthup ïa u Bah Heldy Stemborn (40 snem), Bah Batskhem Kharbhih (44 snem), Bah Kenesing Lyngdoh (28 snem) bad u Bah Siewdor Lyngdoh (30 snem).
Shuh shuh la ong ba kine ki runar hadien ba ki la khang lynti bad phah hiar ïa kine baroh saw ngut na kali, ki la tied bad shoh ïa ki, hadien kata ki la teh ïa u Bah Kenesing Lyngdoh bad u Bah Siewdor Lyngdoh da u tyllai bad ban lute pat ïa ki mobile phone, ki jaiñ, ki slipar, ka wait bad ka pisa kaba long T.300 bad ruh ban rah lang ïa u shabi jong ka kali nalor kiwei kiwei.
Hadien ba ki la dep ban lute, kine ki runar ki la bthah ïa kine ki saw ngut ba kin phet noh na kane ka jaka. Kham hadien la ong ba ïa kine baroh saw ngut la kit noh sha ka PHC kaba don ha Lawbah na ka bynta ban pynïoh ki jingsumar bad jingtah dawai.
