Shillong, Nailar 25
Uwei u nongñiah trok bad u nongbud ki la shah shoh shah tied ha ki runar kiba la kah durkhmat bha bad hadien kata ki la shah lute ka pisa bad ka mobile phone.
Katkum ka khubor na ki pulit la ong ba ha ka 21 tarik mynta u bnai, ha ka por kumba 9 baje mynmiet, ka kynhun ki runar kaba la kah durkhmat kaba don kumba 6 ne 7 ngut eiei, kaba la wan da kawei ka kali Maruti bym don ïa u registration number plate, ka la khang kdong ïa kawei ka trok kaba don ïa u registration number AS01-DC-9227 ha ka thaiñ Jirang ha Ri-Bhoi District.
La ong ba kane ka trok ka dei kaba la ñiah da u Najrul Islam (25 snem), ha kaba na ka liang jong katei ka kynhun ki runar, ki la sei shabar ïa u nongñiah bad kumjuh ruh ïa u nongbud ba la tip kyrteng kum u Mohidul Ali (18 snem) ha kaba ki la shoh la tied bad hadien kata ki la lute ïa ka pisa kaba long T.80,000/- bad ruh kawei ka mobile phone.
La ong ba hadien ba ki la dep ban leh ïa kane ka kam runar, ki la phet krad noh na katei ka jaka.
