Jowai, Nailar 25
Ka Mookyrdup bad ka Umlangchor Mukhla ki la khur jingjop ha ka 3rd bad 2nd Division Football Tournament ba la pynïaid da ka West Jaiñtia District Sports Association (WJDSA) ha ka lah sngi U Blei
Ha ka jingïalehkai Third Division kaba la long ha Kiang Nangbah Stadium, ka Mookyrdup ka la pynliem noh ïa ka Pasyih Cultural da 2-1 kol. Ïa ka kol kaba nyngkong jong ka Mookyrdup la ïarap pynthep da u rangïalehkai ka liang pyrshah u Sambum Dkhar ha ka minit kaba 20 bad kawei pat da u Shiningstar Rymbai (68), katba na ka Pasyih Cultural la thep da u Deivi Rymbai (49).
Ha kawei pat ka jingïakhun hapdeng ka Pamanik pyrshah ïa ka Pynthorlangteiñ bad ka Khliehshning Ïalong ïa ka Lumsliarsliar Mupliang ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Haba phai sha ka 2nd Division, ka Umlangchor Mukhla ka la jop da 2-1 kol ïa ka Chilliangraij. Ïa ki kol jong ka Umlangchor Mukhla la thep da u Ovenson Symblai (3) bad u Niawkor Sari (36) katba na ka Chilliangraij la thep da u Sajemiki Shylla (34).
