Shillong, Nailar 25
U MP ka Congress na Tura u Saleng A Sangma u la shim khia bad ïakren bad ka sorkar pdeng halor ka mat jong ki Rohingya bad ki kynhun lehnoh kiba mih ha ka Jylla Meghalaya.
Haba kren sha ki lad pathai khubor u Saleng Sangma u la ong ba tang khyndiat sngi mynshwa ngi la don ïa ka jingïalang ïamir jingmut ha ka kam pohïing ha kaba nga la pyntip sha u Myntri ka kam pohïing jong ka sorkar pdeng u Amit Shah ha kaba ïadei bad ka jingeh jong ki Rohingya kiba rung sha ka Jylla Meghalaya kumjuh ruh ki lehnoh ki sdang ban seng ha ka jylla.
“Haba ngi kren shaphang ki Rohingya, ki shipai Arakan ki lah ban rung sha kane ka jylla Meghalaya phim lah ban tip,” u la ong.
Halor ka jingkynnoh ba ki lehnoh ki la mih biang ha Meghalaya, u Saleng u la kynthoh ïa ka sorkar namar ka jingbym leh eiei jong ka da kaba ong ba ka tbit bha ha ka “showmanship” hynrei ka duna ka jingmut.
U la kynnoh ruh ba ka sorkar ka pynphai biang ïa ki samla bym don kam don jam sha ka kam lehnoh.
“Ka dei ka jingbakla jong ka sorkar hi. Ka jingkren shaphang kiei kiei kiba heh kiba jia bad ka jingseng kam seng jam bad kane bad katai hynrei baroh ka dei ka jingleh thok lym kumta balei ki khun jong ngi hi kin leit phai biang sha kane ka kam khlaw. Balei kin leit noh? Hato ki shah pynsangeh skul, hato ki shah lehbeiñ? Hato ka la don kano kano ka jingeh jong ki ha kaba ki la shah pynshitom sha kino kino ki jait jingeh shimet,” la ong u Saleng.
U la ong ba ka jingmih biang jong ki lehnoh ha ka jylla ka dei ka mat kaba sngewkhia ïa uwei pa uwei u nongshong shnong ha ka jylla namar ba ki dang pyrkhat ba kita ki sngi kiba shyrkhei jong ki lehnoh ki la kut noh.
U MP ka Tura u la thoh sha u Myntri Rangbahduh, Myntri kam pohïing, bad Myntri kam bar ri, da kaba pynpaw ïa ki mat bapher bapher, kynthup ïa ka jingdih drok, ka jingpahara khappud, ka jingker kaba tlot, ki jaka talasi bad ka jingpynroi ïa ki jingtei hadien ba ka la leit jngoh ïa ki thaiñ khappud dang shen.
“Nga la thoh ha kaba ïadei bad ka jingpynkhuid khlaw ha ki jaka khappud, ka jingpynïaid ïa ki surok khappud, ka jingpynbha bad pynthymmai ïa ki jingker rong saw ha ka thaiñ khappud, ka jingpynheh ïa ka bor jong ki – kita kiei kiei baroh.” U la ong.
U Sangma u la pynskhem shuh shuh ïa ka jingdonkam ïa ka Sorkar Meghalaya ba kan kham peitngor haba kheiñ ïa ka jingjan jong ka sha u pud u sam bad kiwei de ki ri ka pyrtei hadien ka jingshah kem dang shen ïa ki runar bad uwei u pulit Havildar na Bangladesh ha South West Khasi Hills District.
U la ban jur ruh ïa ka jingdonkam ban buddien ïa ki jaka rung bad ki jaka mih beaiñ bad ban pynkupbor ïa ki nongshong shnong da ki tiar ban ïada ïalade.
“Phi pyrkhat kumno shaphang ki runar kiba la shah kem dang shen ha Ranikor, kim dei tang na kawei ka District. La kem ïa ki bad uwei u pulit Havildar Bangladeshi. Lada ki dei ki ‘petty dacoit’ kin jin da la wan tang na kawei ka shnong.” U la ong.
“Kumta ka sorkar ka dei ban tip, ka dei ban buh ïa kano kano ka lad ha kaba kin lah ban buddien ïa kane ka jingrung bad jingmih beaiñ. Ngim dei ban shu shaniah ha ka sorkar pdeng. Namar ba ka don hajan khappud bad kawei pat ka ri, ka jylla jong ngi ka dei ban kham husiar ha ka thaiñ khappud. Kumno ki briew jong ngi ki im hato ngi lah ne-em ban ïada ïa ki briew jong ngi ha khappud bad hato ki briew jong ngi ki don kino kino ki jait tiar ban ïada ïalade – ïa kita kiei kiei dei ban shim khia bha,” la pynpaw u MP.
