Imphal, Nailar:
Ki pulit jong ka Manipur ki la pyntroiñ ïa ka kynhun dawa pisa kaba thmu ïa ki jaka pule bad ki kam khaïi katba ki bor pahara ki la lap ïa ka jaka buh tiar kaba heh bha ha ka por ba ki leh ïa ki kam ba kyrpang ha kylleng ki lai tylli ki distrik ha ka taïew ba la lah.
Kane ka jingkhynra ka la wan ha ka por ba ki pulit ki la ïoh kem ïa u Thongam Dilip Meitei uba dei u dkhot jong ka kynhun Kanglei Yawol Kanna Lup (KYKL) kaba la shah ñiew beaiñ na ka thain Tangjeng Khunou ha Kakching distrik.
Une u briew uba na Napat Mayai Leikai u la ju dawa pisa man ka por na ki skul bad ki trai jaka shna nar kiba treikam ha Kakching bad Thoubal distrik. Ki pulit ki la kurup ar tylli ki mobile phone ha ka por ba kem ïa u, kiba la khmih lynti ba kin ai ïa ki jingtip kiba kongsan shaphang ka jingtreikam jong ka seng ha ka liang ka pisa tyng-ka.
Ha ka sngi kaba bud ka la wanrah ïa ka jinglap kaba kham kongsan shuh shuh haba ki bor pahara ki la lap ïa kawei ka jaka buh tiar kaba shyrkhei na ki kjat lum jong ka shnong Huikap ha ka Imphal East distrik.
Ha katei ka jaka buh tiar la lap ïa kawei ka tiar pynbthei kaba heh 4 kilo, ki suloi kiba bun kiba kynthup ïa ka pistol 9mm bad ar tylli ki suloi kiba don tang kawei ka lyngkhot, ryngkat bad ki bom bad ki tiar siat bapher bapher. Ka jinglap biang ïa ka kor pyntreikam khlem wire ka pyni ba ki tiar ki dei shi bynta jong ka jingtreikam ba la ïatreilang da ki kynhun lehnoh.
Ha kawei pat ka jingjia, ki bor pahara ki la kem ïa arngut ki briew na Kwakta Ward jong ka Bishnupur distrik katba ki dang khaïi tuh ïa ki mar khaïi beaiñ. Lah ban kdew hangne ba u Md. Aziz Khan 23 snem bad u Md. Suraj Khan 20 snem ka rta ki la lap ba ki don 30 byrni ki kwai kiba khia palat 1,300 kilo kiba la thep ha ka kali Tata Yodha jong ki ha Phougakchao Ikhai Bazar.
