Shillong, Nailar 25
Uwei na ki rangïalehkai kriket ba don jingkyrmen ba un dangkiew shaphrang na Jammu and Kashmir, u Fareed Hussain, u la duh noh ïa la ka jong ka jingim tang na ka daw ka jingthurmur u nongñiah ïa kawei ka kali myn ha ka 20 tarik mynta u bnai.
Kat kum ka durkhih lyngba ka CCTV ka la pynpaw shai ba u Hussain u dangñiah da ka scooter jongu ha ka por ba jia katei ka jingjia. Utei u nongïalehkai kriket uba na Poonch district ha J&K, ula ngat ha katei ka jingjia ha ka por ba u nongñiah ïa kawei ka kali kaba la pynïeng harud surok, u la plie kynsan ïa ka jingkhang ha kaba u Fareed um shym la lah ban pynsangeh ïa ka scooter jong u ha kaba ka la leit dei ïa katei ka jingkhang jong ka kali bad u la kyllon ha madan.
Hadien katei ka jingjia la pynkit noh mar mar ïa u sha jaka sumar, hynrei na ka liang ki doktor kim shym la lah ban pyllait ïa ka jingim jong u. La ïathuh ba utei u rangïalehkai kriket, ula khlad noh ha ka sngi Saitjaiñ.
Katei ka durkhih lyngba ka CCTV, ka la saphriang kylleng ha rynsan social media, ha kaba kiba bun ki paidbah ki la pynpaw ka jingpyrshah kaba jur halor ka jingleh thurmur da utei u nongñiah ïa ka kali kaba la wanrah ïa ka jingjia ban sngewsih kat haduh ban da duh ei ïa ka mynsiem briew. Ïa ka jingkhlad noh khlem dei por jong u Fareed la ong ba ka la long ka jingduh kaba khraw ha ka jingïalehkai kriket jong katei ka thaiñ. La ïathuh ba na ka liang ki bor pulit ki dang pynlong ka jingtohkit halor katei ka jingjia.
