Shillong, Nailar 25
U coach ba thymmai jong ka India, u Khalid Jamil ula pynbna ïa ki 23 ngut ki rangïalehkai ki ban pynkhreh ïa ka jingleit shim bynta ha ka CAFA Nations Cup, kaban sa long shen ha Tajikistan, ka ban sdang ha ka 29 tarik mynta u bnai bad kane ka lympung kan long kaba nyngkong eh ban shimti da utei u coach ïa ka kynhun ïalehkai ka ri.
Ha kane ka kynti kaba mynta u khlur ïalehkai ba la shongthait u Sunil Chhetri, um shym la shah kynthup ha ka prokram kilanmet kaba la sdang naduh ka 1 tarik mynta u bnai. na ka liang u Jamil u la pynbiang ïa katei ka thup napdeng ki 29 ngut, watla ka Mohun Bagan kam shym la pyllait ïa ki hynñiew ngut ki rangïalehkai namar katei ka lympung kan shym la hap hapoh ka jingkhmih da ka FIFA. Kiba la shah weng noh ki long u Liston Colaco, Manvir Singh bad u Subhasish Bose.
Napdeng kito kiba la shah jied ha ka por ba la dep ki long u Anwar Ali na ka East Bengal, u Naorem Mahesh Singh bad u Jeakson Singh Thounaojam, kiba la rung sha katei ka jingkilanmet ha ka sngi Thohdieng jong ka taïew ba la lah, katba u Jithin MS u la ai jingtip hadien ba u la pyndep ïa ki jingkular jong ka klob jong u. Kine baroh saw ngut ki la don hapoh kane ka thup kaba khatduh. U nongapkol ba kynsai u Gurpreet Singh Sandhu ruh u wanphai biang sha kane ka kynhun.
Ha katei ka lympung ka India ka la don ha ka Group-B ryngkat ka Tajikistan (kaba pdiang ïa kane ka lympung), kumjuh ka Iran bad ka Afghanistan kiba la bat teng ïa ka nam lahduh. Te kumta ka India kan sdang ïa ka jingïalehkai ba nyngkong pyrshah ïa ka Tajikistan ha ka 29 tarik mynta u bnai, ha kaba yn bud sa ka jingïakhun pyrshah ïa ka Iran ha ka 1 tarik u Nailur bad ïa ka Afghanistan ha ka 4 tarik u Nailur.
U Jamil, uba la lah ban pynpaw ïa ka jingtbit kum u coach ïa ka Jamshedpur FC ha ka Indian Super League, u lah ban ïakynduh mawsiang namar ka India ka la don ha ka kyrdan ba shatrai ha ka AFC Asian Cup namar ka la dang kamai tang 1 poiñ na ki ar sien ïakhun.
Ki kyrteng ki 23 ngut ki rangïalehkai ki long
Goalkeeper: Gurpreet Singh Sandhu, Amrinder Singh & Hrithik Tiwar.
Defender: Rahul Bheke, Naorem Roshan Singh, Anwar Ali, Sandesh Jhingan, Chinglensana Singh, Hming -thanmawia Ralte & Muhammed Uvai.
Midfielder: Nikhil Prabhu, Suresh Singh Wangjam, Danish Farooq Bhat, Jeakson Singh, Boris Singh, Ashique Kuruniyan, Udanta Singh & Naorem Mahesh Sing.
Forward: Irfan Yadwad, Manvir Singh (Jr.), Jithin MS, Lallianzuala Chhangte & Vikram Partap Sing.
