Shillong, Nailar 25
Hadien ba la ïoh jingtip ïa ka jingdon jong kawei ka dukan bar jylla kaba la pynïaid beaiñ khlem da biang ki kot ki sla na ka liang ka Hynñiewtrep Integrated Territorial Organisation (HITO) Shillong City ha ka 25 tarik u Nailar 2025 ka la leit ban khynra ïa katei ka dukan.
Kane ka dukan bar jylla ka dei kaba la tip kyrteng kum ka PP Store kaba don ha Qualapatty, Shillong, kaba la long trai da ka Kumsum Devi bad kaba la pynïaid pat da u khun jong ka u ba kyrteng u Pramod Prasad.
Ha ka jingleit khynra ka seng ha ryngkat ka jingïadonlang ki pulit Enforcement ka KHADC nalor ki bor pynïaid shnong, la lap shuh shuh ba kane ka dukan ym tang ba ka la pynïaid beaiñ khlem ki kot ki sla kiba biang hynrei ka la supply ruh ïa ki tiar ha kylleng ka Nongbah da ki kali shimet. Haba kren sha ki lad pathai khubor na ka liang u samla Banpyntngenlang Syiemlieh u President ka HITO Shillong City u la ïathuh ba kane ka dukan ka die ïa ki mar ki mata ryngkat ruh bad ka jingbym biang ki kot ki sla.
“Ha ka jingïakren bad ki nongpynïaid jong kane ka dukan nyngkong ki la ïathuh ba kidon ïa ki kot ki sla da kaba aidaw ba u trai jong kane ka dukan um don ha Shillong. Ka seng hi ka la ap haduh kumba shikynta tam eiei hynrei une u dkhar ba dei trai ïa kane ka dukan um shym lah ban pynthikna ba u don ka labour lisen bad ka trading lisen”, la ong u samla ban Banpyntngenlang.
“Shisien ba ki briew ba la kamai ki donkam beit ia ka number plate ba stem hynrei kine ki bar jylla ki kamai beit da ka kali shimet bad kane ka long beaiñ” la bynrap u samla Banpyntngenlang.
Haba bynrap pat na ka liang u samla Balajied Jyrwa u General Secretary ka HITO Shillong City u la ong ba kumno kine ki kali shimet ki ïoh ban kamai namar ba katkum ki ain bad ki jingbthah, la bthah ba ki kali kit mar kit mata kidei ban ‘register’ ne pynrung kyrteng bad bad ka tnad transport kum ki commercial Vehicle ym kum ki kali shimet. Hadien katto kattne por ba ladep ban khynra na ka liang ka seng ryngkat ki pulit ka Enforcement bad ka shnong ki la phah khang noh shisyndon ïa katei ka dukan.
