Shillong, Nailar 25
U Myntri Rangbah ka Jylla Meghalaya, u Conrad K Sangma u la pynpaw ïa ka jingïaroh bad ka jingkmen halor ka jingïashim bynta shitrhem jong ki samla ka jylla ban saiñdur ïa ka imlang sahlang lyngba ka Chief Minister’s Youth Centre (CMYC).
Ïa kane u la pynpaw ha ka jingïalang plie paidbah ïa ka Youth Mela kaba la long ha All Saints Cathedral, Shillong ha ka 25 tarik Nailar, 2025 bad kaban sa kut ha ka 28 tarik Nailar, 2025.
Haba ai jingkren ha kane ka sngi kum u kongsan, u Myntri Rangbah u la pynpaw ba ki samla ki dei ki nongpynïaid ïa ka jingkylla ha ki bynta bapher bapher kum ka kam jngohkai pyrthei, ka rep ka riang, ka jingpynmih marbam, ka kam seng kam seng jam, bad kiwei kiwei. U la ban jur ba ka Sorkar, lyngba ka ‘Vision Document’ jong ka, ka la buh ïa ka lynti kaba bniah ban pynkhlaiñ ïa ka ïoh ka kot jong ka jylla da kaba pynshlur ïa ki samla ban shim ïa ki bynta kum ki nongïalam ym tang ha ki kam khaïi bad ki kam seng kam seng jam hynrei wat ha ki kam pynroi nongkyndong bad ki jingthmu babha na ka bynta ka imlang sahlang.
“Ka sengkam sengjam kam dei tang ha ki karkhana heh marwei. Wat ka jingpyrshang jong ki katto katne ngut ki riew shimet ruh ka long kaba kongsan kumjuh.Lada ngi kyntait ïa ki nongseng kam rit, ka jingthmu jong ngi kan sahkut khlem pyndep”, la ong u Myntri Rangbah. U la kyntu ïa ki samla ba kim dei ban kheiñ poh ïa ka dor jong ki kam kiba rit, da kaba kdew ba manla ka jingnoh synñiang ka don bynta ha ka khana jong ka jingroi jong ka jylla Meghalaya baroh kawei.
U Myntri Rangbah u la pynpaw shuh shuh ba ka jinglong nongïalam ba shisha ka shong ha kaba pynkupbor ïa kiwei pat. “Ka jinglong nongïalam kam mut ban leh hi dalade ïa kiei kiei baroh-ka mut ban ai bor ïa kiwei pat ban ïalam bad ban trei hok,” u la ong.
U la ai khublei ïa ka jingpyrshang jong kito kiba pynïaid ïa ka CMYP na ka bynta ka jingaiti jong ki ban pynlong ïa ka prokram kaba kit jingmut, da kaba pynpaw ba kam dei tang ka jingthmu kaba pynshong nongrim ha ki jingjia hynrei ka dei ka rukom kaba pynkupbor ïa ki samla bad tei ïa ka jingkhlaiñ jong ka tnat treikam na ka bynta ka jingroi kaba neh.
Haba pynkut ïa ka jingkren jong u, u Myntri Rangbah u la ong ba ka Chief Minister’s Youth Program ka la paw kum ka nongïalam ba kongsan jong ka jingkylla ha ka jylla Meghalaya bad pynthikna ba ka Sorkar kan ïai bteng ban kyrshan ïa ki samla kum ki nongïalam jong ka lawei.
Na ka liang ka Myntri ka tnat ka koit ka khiah jong ka jylla ka Kong Ampareen Lyngdoh, ka la ban jur ïa ka jingdonkam jong ka jingïashim bynta jong ki paidbah bad ka jingpynsngewthuh paidbah haba ai jingkren ha kane prokram.
Ka Myntri kala kdew ba kum kine ki prokram na ka bynta ki samla ki long kiba kongsan bha ban ïarap ïa ka Sorkar bad ka tnat ka koit ka khiah ban sngewthuh ïa ki jingeh ba shisha kiba ki paidbah ki ïakynduh, khamtam ha ki bynta kum ka jingpynsngewthuh shaphang ka jingpang HIV/AIDS.
“Lada ki shnong ki thaw ki sdang ban pynïapher ïa ki jingtip ba ïadei bad ka jingstad sha ki kyntien kiba suk, kata kan dei ka jaka sdang, bad ngi khmih lynti ban ïatreilang,” ka la ong.
Haba pyrkhat halor ki jinghikai na ka jingpang Covid-19, ka la ban jur ba ka Meghalaya ka dei ban long kaba la pynkhreh bad pynthikna ba kum kine ki jingeh kin ym jia biang. Ka la ai khublei ruh ïa ka jingthmu ban pynrung ïa ki library (jaka buh kot) kiba rit bad ban thaw ïa ki jaka ha kaba ki khynnah na ki skul bapher bapher ki lah ban ïakynduh, ban ïasam jingmut, bad ban pynroi ïa ka jinglong ban pule kot.
Ka Myntri ka la ïaroh ïa u Myntri Rangbah ka Jylla, u Conrad K Sangma uba la pynshlur ïa ki nongshong shnong ban ïashim bynta ha ka jingshna ïa ki rukom treikam bad ka la kdew ruh ba ki rukom treikam kim dei shuh ban long tang ha kamra treikam Sorkar.
Da kaba khot ruh ban ïakren kham bun halor ki mat kum ka jingpynkhreh ban thaw ïa ka longïing longsem bad ka jingïoh khun kaba ïajngai na iwei i khun sha iwei pat, da kaba ban jur ba kum kine ki mat dei ban pynbeit lyngba ka jingpynsngewthuh paidbah ym da kaba pynjari.
Ka Myntri ka la pynpaw ka jingkmen halor ka jingshim bynta lang jong ki Deputy Commissioner, ki nongïalam shnong, bad ki nongshong shnong ha baroh ki rta, da kaba kdew ba wat ki riew rangbah ruh ki la ïashim bynta shitrhem.
Ka la pynkut da kaba pynskhem ïa ka jingkyrshan jong ka ïa ka jingthmu jong ki samla, da kaba pynpaw ba kum kine ki jingpyrshang kin pynkhlaiñ ïa ka lawei jong ka Meghalaya.
Ha kane ka sngi la sam ruh ïa ka NanoGrant, kaba ithuh ïa ki samla kiba dei ki nongthaw ne nongseng kam bad ki kam jong ki. La ithuh haduh 50 ngut ki nongseng kam ban ïoh jingïarap, bad la ai jingïarap ïa ki 10 ngut ki nongseng kam kiba pawnam ha ka jingïalang ha kane ka sngi.
Haduh u snem 2025, ki la don 22 tylli ki Chief Minister’s Youth Centres (CMYC) ha kylleng ki 13 tylli ki block ha ki 8 tylli ki district kiba shakri ïa palat 3500 ngut ki samla da ka jingthmu ban pynheh ïa ki 22 ki jaka sumar ba la don lypa sha ki 64 tylli ha kylleng ki 55 tylli ki block jong ka jylla ha ryngkat bad ka projek MPOWER ba la bei tyngka da ka World Bank kaba thmu ban long ka plan kaba hynriew snem.
Ha kane ka sngi, nalor u Myntri Rangbah ka Jylla, ka Myntri ka tnat koit ka khiah la don lang ruh ka Deputy Commissioner ka East Khasi Hills, ka Kong Rosetta Mary Kurbah, IAS, u Bah Barnari Mawlong, IAS, Deputy Commissioner ka South West Khasi Hills, u Nagakarthik MP, u nongseng ïa ka Sauramandala Foundation, ki ophisar bad ki dkhot jong ka Sauramandala Foundation, CMYC, nalor kiwei kiwei.
