Ki Dorbar Shnong ha Rilum Khasi Jaiñtia ki dei kiwei na ki bakongsan tam ha ka synshar ka khadar bad ka jingpynïaid ryntih ïa ki kam ki jam ha shnong ha thaw. Lada dei ha sor ne ha nongkyndong, ki Dorbar Shnong kiba trei smat bad kiba khlaiñ ki lah ban wanrah jingshngaiñ katba ki Dorbar Shnong kiba alhia bad ba tlot, ki buh jingma kylla ïa ki nongshong shnong. Ngi la ïohi na ka por sha ka por ba haba ki Dorbar Shnong ki khlaiñ, ki shnong ki thaw ki don hapdeng ka suk ka saiñ bad ki briew kiba nabar ruh kim nud ban wan thaw jingkulmar ne ban leh ïa ki kam sniew kam smeh. Lada ki tlot, ka jingwanrung kyrthep jong ki briew kiba nabar kynthup ki bar jylla ka shyrkhei bha namar ym don ba peit ïa ka leit ka wan lane ka rung ka mih jong ki briew.
Lada ym khlaiñ satia ki Dorbar Shnong, kan nym don jingmut lada bun ki aiñ ruh namar lada ki briew ba wan rung tuh nabar, kim ïoh jaka sah ne jaka rieh kin nym lah satia ban shong slem hynrei kim banse ban hap ban phet hi noh. Na ka liang jong ki sengbhalang bapher bapher ki la trei la ka kamram ban peitngor ïa ka rung ka mih jong ki briew ba nabar, hynrei ngi dang sngewthuh pat ba kane kam pat lah satia ban khanglad pura namar yn nym lah hi ruh ban ap pahara bad miet bad sngi. Kumta ki briew ba nabar lada ki ïoh rung makna shapoh ka jylla, la ka long da kaba shu rung tuh ne siew pisa ïano ïano ruh lada ki Dorbar Shnong ki khlaiñ, tang katta ka la biang ban khang pyrshah ïa ki ban rung hapoh ki shnong ki thaw.
Hynrei ngi sngewthuh ruh ba ngi donkam ruh ïa ka jingïatreilang na ki paid nongshong shnong ba kin long lem ki khmat peitngor. Haba ki ïohi ïa kino kino ki riew thymmai hapoh ki shnong ki thaw ki dei ban pyntip mar mar sha ki nongïalam shnong, kane ym tang ba kan ïarap ban khanglad ïa kine ki briew ban ïoh rung khlieh hapoh ki shnong hynrei kan ïarap ruh ban khanglad ïa ki jingsniew kiba lah ban mih.
Ngi lah ban kynmaw ruh ba na ka liang jong ka Executive Committee barim jong ka Khasi Hills Autonomous District Council (KHADC) ka la wanrah katto katne ki jingpynkylla ha ki aiñ kiba la don lypa na ka bynta ban pynkupbor ïa ki shnong bad bthah ïa ki ban pynrung kyrteng ïa ki nongshong shnong bad ithuh ïa ka rung ka mih jong ki na ka bynta ka jingshngaiñ jong ka jaidbynriew. Ki jingpynkylla ba la wanrah ki long hapoh ka aiñ Elaka Administration Act, Appointment and Succession of Chief and Headmen Act, 1959, Appointment of Syiem and Deputy Syiem bad lyngba kine ki aiñ, yn aibor ïa ki bor shnong ban lum jingkheiñ ia ka jingdon ki briew khnang ban tip ïa ki briew kiba wan nabar.
Kumta ngi sngewthuh ba kan long ka jingïarap lada pynbha ïa kine ki aiñ kiba la don lypa lyngba ka bor shnong bad Hima ban tehlakam ïa ka jingwan kiba nabar bad ithuh ïa kiba dei ki nongshong shnong bad kiba shu wan trei bylla.
Haba phai ruh sha ka jingjyllei u drok, ka jinglah ne ka jingbymlah ban ïakhun pyrshah ïa u drok ka shong ha man la kawei pa kawei ka longïing longsem. Lada ngi kheiñ ïa ka longïing longsem kum ka kynja baïar, ka Dorbar Shnong ka dei kaba wan hakhmat eh. Ka Dorbar Shnong ka dei ka nongri nongsumar ïa ki shnong ki thaw ha ka Bri U Hynñiewtrep bad lada ka khlaiñ, ki nongshong shnong ruh kin shngaiñ. Ngim ong ba ki Dorbar Shnong ki dei ban shim ïa ka aiñ ha la kti ban pynshitom ne shoh ïa ki nongkhaïi lane nongdih drok, hynrei lada ki peitngor bha, ki lah ban ïarap ïa ki bor jong ka aiñ ban kem ïa kiba kum kine ki briew. Ngi dei ban sngewthuh pat ba ki nongdih drok ki donkam ïa ka jingsumar bad jingïasyllok da ki briew kiba la shemphang ha ka kam katba ka ruh nar ka dei ban ap lypa ïa ki nongdie.
Ka Dorbar Shnong ka dei ruh ban ïoh ïa ka jingïatreilang jong baroh ki nongshong shnong khnang ba lada don kano kano ka jingjia, yn lah ban ïa tur khlem buh teng. Ngi sngewthuh ba ki shnong ki thaw khamtam ha khap sor ki la nang ïar. Ka jingbun ki briew ka la shyrkhei. Kam dei kaba suk ïa ki Dorbar Shnong ban tehlakam ïa kawei pa kawei ka kam. Hynrei donkam ïa ka jingïatreilang jong baroh ba ngin ïa lait na ka saw ka sian bad ki jingma kiba shyrkhei kiba ap thap khamtam ïa ki samla samhoi. Ka longïing longsem kaba khlaiñ ka pynthikna ba ka lawei ruh kan long kaba khlaiñ bad ba shngaiñ. Lada bakla na ïing, la bakla lut nadong shadong. Namarkata, baroh ngi donkam ban ïa pynkhlaiñ ïa la ka ïing ka sem (Dorbar Shnong) khnang ba ngin lah ban ïakhun ïa ki jingeh kiba la wan tyllep ïa ki shnong ki thaw, imlang-sahlang bad ka jaidbynriew.
