Nongstoiñ, Nailar 25
Ka kynhun ki ‘thei ïalehkai ka WLG ka la khur ïa ka nam lahduh ha ka lympung ïalehkai futsal ïa kaba la tip kum ka 1st Knockout Women Futsal Tournament 2025 ïa kaba la pynlong da ka Kwis Futsal.
Haba phai sha kane ka lympung ïalehkai , ka nam lahduh jong ka WLG ka la wan hadien ba ka la lah ban pynliem noh da 1-0 kol ïa ka Amhynjong ha ka jingïalehkai final kaba la long ha ka sngi Saitjaiñ ha madan Kwis Futsal, Nongrim Upper New Nongstoiñ.
Ha katei ka sngi u Bah P.S. Marweiñ, DSP Head quarter ka EWKH u la long u kongsan uba la wan ha ka jaka jong u Bah V.D.S Rymbai, Commandant ka 4th MLP Bn Sohpian u bym shym la wan shuh namar ki daw bym lah kiar, ha ka jingdonlang ruh u Bah Shailambok Marbaniang kum u symbud kongsan , ki dkhot ka Kwis Futsal ba kynthup ïa u Bah Fulding Mawlot ,bad Hamar Lyngkhoi bad kiwei kiwei.
Shuh shuh ha katei ka sngi, na ka liang ki kongsan ki la ïoh ban sam ruh ïa ki khusnam kaba la long da ka pisa sha ki ar tylli ki kynhun kiba la poi sha ka final.
Lah ban kdew ba ha katei ka lympung ïalehkai futsal ki don kumba 9 tylli ki kynhun kiba la wan ban ïashim bynta na kylleng ki jaka na ka thaiñ Nongstoiñ.
