Shillong, Nailar 25
Ka Meghalaya State Planning Board (MSPB) ka la pynkhreh ban aiti ïa ki jingai jingmut ba bniah sha ka Sorkar Jylla na ka bynta ban pynïar ïa ki surok kiba la don lypa, ban shna ïa ka surok thymmai bad kiwei ki lad ki lynti ban weng ïa ka jingeh ha ka leit ka wan ha ka nongbah Shillong.
Ïa kane la pyntip da u Chairman ka Board, u Bah Metbah Lyngdoh hadien ba la pynlong ïa ka jingjurip sha ki katto katne ki jaka ha ka nongbah ha ka sngi Nyngkong. Ha kane ka sngi la synran lang ruh da ki Rangbah Shnong jong ka shnong Lumbatngen, Sawlad bad Lapalang.
Haba ïakren bad ki lad pathai khubor, u Bah Metbah Lyngdoh u la ong ba ka Board ka la sdang ïa ki jingpyrshang ban weng ïa ka jingeh ha kaba ïadei bad ka jingjur ka jingdheng kali bad ka jingkhapngiah ha kane ka nongbah Shillong.
“Ngin sa aiti shen ïa ka kaiphod ban ai jingmut jur ïa ka Sorkar Jylla ban shim ïa ki sienjam naka bynta ban pynïar ïa ki surok kiba la don lypa bad ban shna ïa ki surok thymmai ban weng ïa kane ka jingeh jong ka jingkhapngiah ki kali,” u la bynrap.
U Bah Metbah u la pyntip ba ha kane ka jingleit jurip, ka Board ka la ithuh ïa ka lad na Saw Lad sha Lapalang bad Lumbatngen bad kumjuh ruh ïa ka surok hajan ka Assam Regiment kum ki jaka ba kongsan ban pynbha, da ka jingthmu ban pynheh ïa ki surok kiba la don lypa bad ban shna thymmai ban pynduna ïa ka jingkhapngiah.
“Ka Board ka la ïohi ba ki don ki jaka ïada bad kiba dei jong ki trai jaka shimet. Ngi la rai ban bishar bniah ïa kane ka kam bad buh ïa ka jingai jingmut jong ngi sha ka Sorkar Jylla (na ka bynta ban wad ïa ka lad ban ïoh jaka ban pynheh ïa kine ki surok,” la ong u Chairman katba da kaba pynksan ïa ka jingdonkam ïa ka jingkyrshan bad jingïatreilang na baroh ki liang kiba don bynta ban ïaleh pyrshah bha ïa ka jingkhapngiah kali.
Shuh shuh u Bah Metbah u la pyntip ba ka Board ka la ithuh ruh ïa ka surok Umpling sha Dongsharum. Kane ka dei kawei pat ka surok kaba donkam bha na ka bynta ban pynduna ïa ka jingdheng kali ha ka thaiñ Rynjah, namar kane kan pynïasoh ïa ki jaka ïakynduh ba kongsan naduh MES shaduh Demseiñïong bad na Ïew Rynjah haduh Nongrim Hills.
“Ngin sa bishar bniah ïa kane hadien ba ngi la ïakren bad ka PWD bad katkum kane ngin aiti ïa ki jingai jingmut jong ngi sha ka Sorkar Jylla,” u la ong.
Katkum ka jingong jong u, ka jingkhapngiah jong ka nongbah Shillong ka dei ka jingeh kaba la slem bha, ha kaba ki surok kiba khim jong ka nongbah bad ka jingkiew ka jingkit jong ki kali ka wanrah ïa ka jingeh kaba pynlong ïa ki briew ban sahkut ha ka jingdheng kali da ki kynta.
Ka Board ka la jurip ruh ïa kiwei pat ki surok, kiba lah ban ïarap haka ban weng ïa ka jingdheng kali ha nongbah Shillong.
