Cairo, Nailar:
Katkum ki khubor, la ong ba ka Israel ka la phah ia ki liengsuiñ thma jongka ban leit hiar thma ïa ka nongbah Yemen ha ka Sngi U Blei, tang hadien katto katne sngi ba ki lehnoh Houthi ki la siat ïa u ‘namding jongki sha Israel. Kane ka long ka sien hiar thma ba hadien duh eh jong ka Israel kaba thmu ban leit kput pyrshah ia katei ka kynhun lehnoh ba la ioh jingkyrshan na ka Iran.
Ka Houthi ka iathuh ba ki jinghiar thma, ki la ktah ia kiba bun tylli ki jaka ha kylleng ka nongbah Sanaa, kynthup ia kawei ka bording planet bad ka jaka theh umphniang. Ki nongshong shnong ki la iathuh ba ki la iohsngew ia ka jingsawa kaba jur jong ki jingbthei ha ki jaka, kynthup hajan ka iing jong u president.
Ki jinghiar thma kiba la iathuh ki dei kiba nyngkong eh ban hiar thma ia ka Yemen naduh shi taiew mynshwa, ha kaba ka Israel ka la ong ba ki jingtei bor ding kiba la thmu, kiba ka ngeit ba la pyndonkam da ki lehnoh. Ka Israel kam shym la pynthikna mardor ïa kane ka jingshah thombor ha ka Sngi U Blei.
Ki Houthis kiba la kyrshan da ka Iran, ki la siat namding bad ki drone sha Israel bad ki la thombor ruh ia ki jhad ha Red Sea la palat 22 bnai. Ki ong ba ki pynlong ia ki jing thombor kum ka jingiasnohkti lang bad ki nong Palestine hapdeng ka thma ha Gaza Strip.
Ki nongshong shnong jong ka Sanaa ki la ïathuh ha ka The Associated Press ba ki la ïohsngew ïa ki jingbthei kiba jam hajan kawei ka jaka pule shipai kaba la khang bad ka ïing syiem jong u president. Ki la ong ba ki lah ban iohi ia ki tdem tdem hajan ka madan Sabeen, kaba dei ka jaka ialang pdeng ha ka nongbah.
U Ahmed al-Mekhlafy, uwei pat u nongshong shnong, u la sngew ruh ïa ka jingkhlain bor jong ki jingshah thombor. “Ka iing ka la khih, bad ki jingkhang ki la bthei”, u la iathuh ha ka AP lyngba ka phone.
Kane ka jinghiar thma ka long tang katto katne sngi hadien ba ki Houthi ki la kam ba ki la siat ïa ki namding ba la pynkhreh thymmai sha Israel, kynthup ruh ban siat ïa ka kad liengsuiñ kaba heh tam jong ka ri. Ym shym la don kano kano ka jingjulor ne jingmynsaw ha Israel na utei u namding ba la siat ha ka sngi Palei. Ki shipai jong ka Israel ki la ong ba ki la ïakhlad noh ha suiñbneng hadien ba ki la pyrshang bunsien ban khanglad ïa ka.
Kane ka long ka sien kaba nyngkong ba ki lehnoh Houthi kin siat ïa u bom ‘cluster’ sha Israel naduh ba katei ka kynhun lehnoh ka la sdang ban ther ‘namding sha Israel ha u snem 2023, ong utei u heh sorkar.
Ka jingpyndonkam ia ki bom cluster ka pynlong ia ka Israel ban kham eh ban khanglad bad ka pyni ruh ia ka jingstad ba la pyndap sha ki Houthi da ka Iran, la ong u heh sorkar.
Ki jingshah thombor jong ki Houthi ha kine ki ar snem ba la dep ki la pynthut ïa ka jingkit jingbah ha ka Duriaw Basaw, ha kaba kumba $1 trillion ki mar ki ïaid man la u snem.
Naduh u Naiwieng 2023 haduh u Nohprah jong u snem 2024, ki Houthi ki la thombor ïa palat 100 tylli ki jhad da ki namding bad ki drone. Ki lehnoh ki la pynsangeh noh ïa ki jinghiar thma jong ki ha ka por ba sangeh thma lyngkot ha ka thma bad hadien ki la kylla long ka thong jong ka jinghiar thma kaba jur bha, kaba la neh da ki taiew, kaba la hukum da u President jong ka U.S., U Donald Trump.
Ha u bnai Jymmang, ka America ka la pynbna ïa ka jingïateh kular bad ki Houthi ban pynkut noh ïa ki jinghiar thma da ki liengsuiñ kum ka jingsiew kylliang ïa ka jingpynkut noh ïa ki jinghiar thma da ki liengsuiñ, watla ka kynhun lehnoh ka la ong ba ka jingïateh kular kam shym la kynthup ïa ka jingpynsangeh ïa ki jinghiar thma ïa ki thong ba ka ngeit ba ki ïadei bad ka Israel.
