London, Nailar:
Katkum ki khubor, la ong ba uwei u khynnah 15 snem bad uwei u rangbah ba 54 snem ka rta, ki la shah kem noh ha London halor ka jingsuba thang pyn pluh ia ka jaka bam jong ki nong India ha ka Sngi U Blei, kaba don sha ka phang Mihngi jong ka nongbah London, ha kaba 5 ngut ki la mynsaw jur ha katei ka jingjia ha katei ka sngi.
Ki pulit ka Metropolitan Police ki la iathuh ba ki ophisar jong katei ka tnat pulit, ki la ioh jingtip na katei ka jaka bam jong ki nong India kaba don ha Ilford ha ka miet jong ka Sngi Thohdieng.
Kumta la ong ba 3 ngut ki kynthei bad 2 ngut ki shynrang kiba la ngeit ba ki dei ki nongbam ja ha katei ka jaka bam, ki la mynsaw na katei ka jingpluh kaba la jia ha katei ka sngi bad la sumar ia ki ha katei hi ka jaka, da ki nongsumar na ka kynhun London Ambulance Service shwa ban rah noh syndon ia ki sha jakasumar naka bynta ki jingsumar kiba kham bniah. Arngut na ki – uwei u shynrang bad kawei ka kynthei – ki dang don ha ka jingma kaba khraw ba ki lah ban duh noh wat ia ka jingim jongki ruh lada ym lah ban ai ia ka jingsumar kaba biang tam ha ka por kaba kyrkieh.
Ia kitei ki nongshah suba, la kem noh da ki bor pyniaid halor ka jingsuba ba dei ma ki, kiba leit thang pyn pluh ia katei ka jaka, da ka jingthmu ban buh jingma ia ka jingim jong kitei kiba leit bam ha katei ka jaka bad haduh kane ka Step Sngi Nyngkong ki dang don ha kti jong ki pulit.
“La ngeit ruh ba ki don sa 2 ngut kiba la ngat bad mynsaw ha katei ka jingjia, hynrei kiba la phet noh na katei ka jaka hashwa ba ki pulit kin leit poi hangtei. Ka jingpyrshang ka dang iaid shakhmat ban ithuh ia ki,” la ong ki pulit.
Haba iadei bad kane, la ong ba katei ka jaka bam ka la mad ia ka jingshah pynjulor kaba jur ha katei ka jingpluh, ha kaba ki para marjan ki la sakhi ia ka jinglynñiar kaba shyrkhei na katei ka jaka ha katei ka miet Sngi Thohdieng.
Ki don katto katne ki khubor na ki dur CCTV kiba pyni ia ka kynhun ki briew kiba la kah dur khmat, kiba iaid shapoh katei ka jaka bam bad theh ia ki kynja ynphniang ha madan shwa ba kan klang ka ding kaba jur ha katei ka jaka bam.
Katei ka jaka bam, kaba la pyniaid da u Rohit Kaluvala, ka pynpaw ruh ialade, ba ka long ka jaka bam, kaba ju shet bad wanrah ia ki jait jingbam ba paka jong ki nong India.
