Mawkyrwat, Nailar 25
Ki arngut ki MLA ka United Democratic Party (UDP) jong ka Ranikor bad Mawsynram Konstitwensi kata u Bah Pius Marwein bad u Bah Olansing Suiñ hadien ka jingud jingnam jong ki paidbah jong ki artylli ki konstitwensi ha kine ki khyndiat sngi ba la dep ki la leit ban jurip ïa ka jingkieng dieng kaba la rim bha kaba don ha ka shnong Balat bad Dangar bad kaba dei ka jingkieng kaba pynïakhlad ïa ki artylli ki konstitwensi kata ïa ka Mawsynram bad ka Ranikor.
Ha kane ka jingjurip la ïadonlang ruh ki ophisar jong ka tnat PWD bad u kontraktor bad baroh arngut ki MLA ki la sakhi da la ki jong ki khmat ïa ka jingsator bad jingkhim kane ka jingkieng kaba wanrah jingeh bad jingthut ha ka ïaid ka ïeng ha kaba ki kali heh bad kali kit jingkit kim lah shuh ban ïaid na kane ka jingkieng artad ba kane ka jingkieng ka don hajan ka ïew Balat kaba dei kawei na ki ïew kaba heh duh ha kine ki thaiñ khappud.
Hynrei ha kane ka jingjurip, ka long kaba khubor kaba sngewtynnad ïa kine ki arngut ki MLA haba na ka liang ka Sorkar Jylla lyngba ka tnat PWD ka la ïoh ban mang pisa na ka bynta ban pyntrei noh da ka jingkieng RCC ha ka jinglut kaba T.8 klur duna eiei.
Haba ai jingkren, na ka liang ki arngut ki MLA ki la ai khublei kyrpang ïa ka Sorkar MDA-2 hapoh ka jingïalam u Conrad K Sangma bad ïa ka tnat PWD hapoh ka jingïalam u Bah Prestone Tynsong kiba la sngap bad shah shkor ïa ka jingud jingnam bad ka jingangnud ki paidbah kane ka dong ka thaiñ ha kaba shen yn sa sdang ban pyntrei noh ïa kane ka jingkieng kaba long kaba donkam haduh katta katta ïa kine ki artylli ki konstitwensi.
