Shillong, Nailar 25
U Myntri Rangbah ka Jylla u Conrad K Sangma hadien ka jingïakren kaba bniah bad ki Nongïalam ka Garo Hills Autonomous District Council (GHADC) lem bad u Lat ka Jylla, ha ka 25 tarik u Nailar, 2025 u la pynbna ba ka Sorkar MDA-II ba synshar da ka National People’s Party (NPP) kala shim ïa ka rai ban pynsiew hi noh ïa ka tulop naduh ka 1 tarik u bnai Naiwieng 2025 ïa ki nongtrei jong ki lai tylli ki ADC kata ka KHADC, JHADC bad GHADC
Haba ai jingkren, u Myntri Rangbah u la ong ba ka Sorkar kala shim ïa kane ka rai halor ka jingshem jingeh ki District Council ban siew ïa ki tulop ki nongtrei namar ki duna ki jingpynmih pisa.
U la ong ba halor kane, ka Sorkar kala rai ba naduh ka 1 tarik Naiwieng, 2025, ka Sorkar Jylla kan sa siew noh ïa ka tulop na ka bynta ki District Council bapher bapher ka Jylla.
Shuh shuh u la ong ba “Kane kan dei ka khyllipmat ban sah jingkynmaw namar shisien bala siew ïa ka tulop, ki ADC kin lah ban pynleit jingmut ha ki kam ba kongsan, ka roi ka par bad ki kam ba ïadei bad ka kolshor bad ka tynrai.”
Khnang ban pynthikna ïa ka jingpyntreikam bha ïa kane ka rai, u Myntri Rangbah u la pyntip ba ka Sorkar kan sa thaw ïa ka komiti, ka ban ïakren bad baroh ki District Council.
U la ban jur ruh ba “Ka jingthmu jong ngi ka long beit thik tang ban wanrah ïa ka jinglong shngaiñ ha ka pisa tyngka ki ADC bad ka rukom treikam kaba biang khnang ba kin lah ban siew ïa ka tulop ki nongtrei ha ka por kaba dei bad ba kin lah ban bteng ïa ki jingtreikam bad trei katkum ka rukom bala buh da ka Riti Synshar ka Ri”. Hynrei u la kren shai ruh ba ka Sorkar Jylla kan ym mushlia ha kaba ïadei bad ka jingtreikam ki District Council.
U Conrad u la ong ba ka GHADC ka mad ïa ka jingduna pynmih pisa bad jingpynlut bad ha kaba ka jingdonkam ban siew tulop ha ka shisnem ka kot sha ka T.70 klur, katba ki jingmih jong ka pat kim kot wat palat ïa ka T.30 klur.
