Mawkyrwat, Nailar 25
U Divension Lyngdoh uba la kynthoh pyrshah ïa ki nongïalam jong ka South West Khasi Hills District Cricket Asso-ciation (SWKHDCA), u la wan shakhmat ban panmap halor ki jing-ïaleh pyrshah jong u ïa katei ka synjuk.
Kane la wan hadien ba ka SWKHDCA ha kine ki khyndiat sngi ba la dep, ka la aiti sha ka Disciplinary Committee ba kan leh ïa kaba donkam pyrshah ïa utei u rangïalehkai katei ka thaiñ uba la kynthoh pyrshah ïa ki nongïalam katei ka synjuk kiba kynthup ïa u President Bah Banteibor Lyngdoh bad u Secretary Bah Bakhaiñbor Nongsiej.
Katei ka jingkynthoh pyrshah u Divension ka la wan hadien ba um shym la shah jied ban mihkhmat ïa ka Jylla na ka bynta ki lympung ïalehkai (senior) ban pynïaid da ka BCCI jong ka aïom ïalehkai 2025-26.
Kat kum ka kyrwoh ba la pyllait da katei ka synjuk ha ka lah sngi U Blei, kata u Bah Banteibor Lyngdoh bad bah Bakhainbor Nongsiej ki la ong ba kum ka synjuk ka dap da ka jingsngewkhia ïa kane ka kam namar ba ka la ktah ïa ka burom jong ka district hi baroh kawei hadien ba utei u rangïalehkai u la mih shakhmat ban thad madan pyrshah ïa katei ka synjuk lem bad ïa ka Meghalaya Cricket Association (MCA) ha kine ki khyndiat sngi ba la lah.
Ki la ong ruh ba dei hadien ba ka synjuk ka la ai da ka ‘show cause notice’ pyrshah ïa u bad ban shim syndon da ka rai kaba tyngeh, kaba la pynlong ïa utei u rangïalehkai ban wan panmap hakhmat katei ka synjuk.
La ïathuh ruh ba na ka liang u Divension u la kular ba un ym mlien shuh nangne shakhmat ban leh ïa kine ki kam bad u la ong ruh ba lada ka SWKHDCA kan shim ïa u da kano kano ka rai, un kloi ban pdiang.
Khatduh ïawai na ka liang katei ka synjuk ka kyntu ïa baroh ki nongïalehkai jong ki ‘affiliated club’ bapher bapher ba na ka liang ka SWKHDCA ka la maham ba kan ym ailad ïano ïano lada ki pynkheiñ ïa ki kyndon jong ka.
