Shillong, Nailar 25
Ka Sorkar Meghalaya kala pynmih ïa ka jingpynbna ban sdang pyntreikam noh ïa ka Chief Minister’s Scholarship Scheme (CMSS), 2025, ka prokram bala wanrah da u Myntri Rangbah Conrad K Sangma ha ka mang tyngka 2025-26 ka Jylla.
Ïa kane ka skhim la pynwandur khnang ban pynïar ïa ka lad ban ïoh ïa ki jingpule kiba kham shalor, ban kyntiew ïa ka jingnang jingstad, bad ban kyrshan pisa sha ki samla pule ka Meghalaya naduh ka Class XI haduh ka kyrdan Ph.D., kiba pule ha ki jaka pule ba la ithuh hapoh bad shabar ka Jylla.
Katkum ka jingpynbna, la ong ba ki samla pule kiba dei hok ban ïoh ïa ka skhim, kin ïoh T.6000 ba la buh ha ka shisnem, ïa kaba yn sa thep beit sha ki bank account jong ki.
Ka CMSS ka long kaba kyrpang namar ba kam don ka jingbuh kyndon ïa ka jingïoh kamai na ka bynta ki nongaplai, kaba pynthikna ba baroh ki samla pule kiba dei hok kiba shong ba sah ha Meghalaya kin ïoh jingmyntoi. Ki samla pule kiba pule ïa ki jingpule ba man ka por ha ki jaka pule Sorkar, ki riew shimet, bad ki jaka pule ba la ithuh da ka ri ki lah ban aplai.
Ban pynthikna ïa ka rukom pyllait ïa ka skhim ha ka lynti kaba shai bad kaba paka, yn pdiang ïa ki aplikeshon tang lyngba ka online. La buh ruh ïa ka web portal ba kyrpang (https://meghalayaone.gov.in) ba kan treikam live naduh ka 1 tarik Naiwieng 2025, ka ban dei ka sngi ba ki samla pule kin sdang ban phah ïa ki aplikeshon.
Ki kot ki sla kiba donkam ki kynthup ïa ki syrnot nongshong shnong/ ki ID kum ka MHIS Card, MGNREGS Job Card, EPIC lane PDS card, ka mark sheet jong u snem ba la lah, ka passpost size ba dang shu shon thymmai, bad ka bonafide certificate na ki Principal/Headmaster ki jaka pule.
Haba ai jingkren ha ka jingpyllait ïa kane ka skhim, u Myntri Rangbah u la ong, “Ka jingnang jingstad ka dei ka nongrim na ka bynta ka lawei jong ki samla jong ngi. Lyngba ka Chief Minister’s Scholarship Scheme, ngi kut jingmut ban weng ïa ki jingeh ha ka liang ka pisa tyngka bad ai bor ïa ki samla ka Meghalaya ba kin lah ban bud ïa ki jingangnud jong ki da ka jingshaniah skhem halade.”
Ka tnat Pule Puthi ka kyntu ïa baroh ki samla pule ba dei hok ban ïoh ïa ka skhim, ba kin sdang ban aplai naduh ka 1 tarik Nailur, 2025 bad ban shim ïa kane ka kabu.
