Shillong, Nailar 25
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor na ki pulit la ong ba u Siddarth Chettri u la ai ka jingujor ba ha ka 22 tarik mynta u bnai, ha ka por kumba 12.30 shiteng synñia, ka arshaka ka jong u, kaba don ïa u registration number ML05-Z-3452 la lap ba ka la jah na Taproom, Fourth Furlong, Polo, Shillong.
Ha kawei pat ka khubor u Rishab Agarwal u la ai ka jingujor ba ha ka miet jong ka 21 tarik mynta u bnai, ki runar bym lah ban ithuh, ki la prong tuh hapoh ka dukan ka jong u, kaba don ha Mawlonghat, Shillong bad ban tuh ïa ka pisa kaba long T.25,430/- bad ruh ki mar kiba shongdor kumba T.14,880/-.
Ka Kong Sweety Kharmuti ruh ka la ai ka jingujor ba hapdeng ki tarik 21 bad 22 tarik, kata hapdeng ka 6 baje janmiet haduh 5.30 janmiet, ki runar bym lah ban ithuh ki la prong tuh hapoh ka ïing sah ka jong ka, kaba don ha Pohkseh, Shillong bad ban tuh uwei u LPG cylinder, kawei ka mobile tablet, kawei ka isteri bad ka pisa kaba long T.2,000/-.
Kumjuh ruh na ka liang ka Kong Virginia Jyrwa ka la ai ka jingujor ba ha ka 22 tarik mynta u bnai ha ka por kumba 6.45 mynstep, ki runar bym lah ban ithuh ki la tuh ïa ka arshaka ka jong ka, kaba don ïa u registration number ML05-Z-4337 kaba la thied ha ka kyrteng jong u Bah Bakyrpang Khongnoh uba na Pynursla, ka la shah tuh na Jaiaw, Laitdom, Shillong.
Ka Divya Barman ruh ka la ai ka jingujor da ka ktien ba ha ka 21 tarik mynta u bnai ki runar bym lah ban ithuh, ki la tuh ïa ka arshaka ka jong ka kaba don ïa u registration number ML05-Y-5008 na ka thaiñ Laban, Shillong.
U Bah Bibatdor Nankar Syiem ruh u la ai ka jingujor ba ha ka 18 tarik mynta u bnai, ki runar bym lah ban ithuh ki la tuh ïa ki saw tylli ki battery na ka DG shed ba la pynïeng hapoh ka madan JN Stadium, Polo, Shillong.
U Bah Teibormi Shylla ruh u la ai ka jingujor ba ha ka miet jong ka 20 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-0484 na phyllaw ka jaka sah ka jong u, kaba don ha Madanrting, Lumjingsuk, Block-A, Shillong.
Ka Salma Khongthaw ruh ka la ai ka jingujor ba ha ka 21 tarik mynta u bnai, ha ka por kumba 2.50 mynsngi, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-AC-0799 na ka thaiñ Jhalupara, Shillong.
